काठमाडौं । थप पाँच बैंकले मर्जरमा जान नेपाल राष्ट्र बैंकसमक्ष लिखित प्रतिबद्धता व्यक्त गरेका छन् । सिद्धार्थ बैंक, स्ट्ययान्डर्ड चार्टर्ड बैंक, नेपाल बंगलादेश बैंक, प्रभु बैंक र बैंक अफ काठमाण्डुले राष्ट्र बैंकलाई आफू तयार रहेको जनाकारी दिएका छन् ।
यससँगै मर्जरका लागि राष्ट्र बैंकमा प्रतिबद्धता बुझाउने वाणिज्य बैंकको संख्या २२ पुगेको छ । राष्ट्र बैंकमा तीनवटा सरकारी बैंकसहित अन्य ३ बैंकले भने मर्जरको प्रतिबद्धतापत्र बुझाएका छैनन् । ती ८ बैंकमा नबिल बैंक, एभरेस्ट बैंक, प्राइम कमर्सियल बैंक रहेका छन् ।
विकास बैंक र लघुवित्ततर्फ भने मर्जरका लागि लिखित प्रतिबद्धता बुझाउनेमा सांग्रिला डेभलमेन्ट बैंक, महालक्ष्मी विकास बैंक, सहयोगी विकास बैंक तथा नेपाल माइक्रोफाइनान्स बैंकर्स एसोसिएसनसहित महिला सहयात्रा माइक्रोफाइनान्स र स्वावलम्बन लघुवित्त वित्तीय संस्था रहेका छन् ।
यसअघि ग्लोबल आईएमई बैंक र जनता बैंकबीच मर्जरमा जाने समझदारी भएको छ । यसैगरी प्राइम कमर्सियल बैंकले कैलाश विकास बैंक र सिटिजन्स बैंक इन्टरनेसनलले सहयोगी विकास बैंकलाई प्राप्ति गर्ने समझदारी भइसकेको छ ।
पछिल्लोपटक प्रतिबद्धता व्यक्त गर्ने बैंकमा स्ट्यान्डर्ड चार्टर्ड बेंकले बैंकको बैंकिङ रणनीति (कोर स्ट्र्याटेजी) नबदलेर मर्जरमा जाने अडान लिएको छ । बैंक आफू स्ट्यान्डर्ड चार्टर्ड बैंक नै रही मर्जर गर्ने बताएको हो । यसैगरी नेपाल बंगलादेश बैंकले सञ्चालक र आएफआईसीसँग थप छलफल गर्नुपर्ने जानकारी गराएको छ ।