काठमाडौं । न्युजिल्यान्डले आईसीसी एकदिवसीय विश्वकप क्रिकेटको फाइनलमा घरेलु टोली इङल्यान्डलाई २४२ रनको लक्ष्य दिएको छ । निर्धारित ५० ओभरमा ८ विकेटको क्षतिमा न्यूजिल्यान्डले २ सय ४१ रन बनाएपछि इङ्ल्यान्डले उपाधि जित्न २ सय ४२ रनको लक्ष्य पाएको हो ।

लर्डसमा टस जितेर पहिला ब्याटिङ गरेको न्यूजिल्यान्डका लागि हेनरी निकोलसले अर्धशतक बनाए । ७७ बल खेलेका हेनरीले ४ चौकाको मदतमा ५५ रन बनाए । ओपनर मार्टिन गुप्टील पवेलियन फर्किएपछि कप्तान केन विलियम्सनसँग साझेदारी गरेका निकोलस लियाम प्लंकेटमार्फत बोल्ड भए ।

टोम लाथम अर्धशतक बनाउन ३ रनले चुके । ५६ बल खेलेका लाथमले २ चौका र १ छक्काको मदतमा ४७ रन बनाए । उनी क्रिस वोक्सको बलमा क्याच भए । कप्तान केन विलियम्सनले ३० रनको योगदान दिए । ५३ बल खेलेका कप्तान विलियम्सन २ चौका प्रहार गर्दै प्लंकेटको बलमा जोस बटलरमार्फत क्याच भए । १८ बलको सामना गर्दै १ छक्का र २ चौकाको मदतमा १९ रन बनाएका गुप्टीललाई वोक्सले एलबिडब्लु धराप पारे ।

जेम्स निसमले १९ रन बनाए । प्लंकेटको बलमा जोय रुटमार्फत क्याच भएका निसमले ३ चौका प्रहार गरेका थिए । रोस टेयलर १५ रनमा मार्क वुडको बलमा एलबिडब्लु शिकार भए ।

१६ रन बनाएका कोलिन डि क्रिस वोक्सको बलमा क्याच भए । म्याट हेनरी ४ रन बनाउँदै जोफ्रा आर्चरको बलमा बोल्ड भए । मिचेल स्यान्टनरले ५  रन बनाउँदा टेन्ट बोल्ड १ रनमा अविजित रहे ।

इङ्ल्यान्डका लियाम प्लंकेट र क्रिस वोक्सले ३-३ विकेट लिए । मार्क वुड र जोफ्रा आर्चरको नाममा १-१ विकेट रह्यो । उपाधिका लागि २ सय ४२ रनको लक्ष्य पाएको इङ्ल्यान्डले अहिले केहीबेरमा जवाफी ब्याटिङ गर्नेछ ।

दुबै टोली उपाधि जित्ने लक्ष्यमा छन् । इङल्याण्ड २७ वर्षपछि फाइनल खेलिरहेको छ भने न्युजिल्यान्ड गत संस्करणको उपविजेता हो । दुबै टोली आज उपाधि जित्दै विश्व क्रिकेटको ४४ बर्षिय इतिहासमा आफनो नाम दर्ता गर्ने रणनीतिमा छन् ।