बीबीसी । १२ औं संस्करणको आईसीसी एकदिवसीय विश्वकप क्रिकेटको उपाधि इङ्ल्यान्डले आफ्नो नाममा लेखाएको छ । लामो समयको प्रयासपछि विश्वकपको पहिलो संस्करण आयोजना गर्ने इङ्ल्यान्ड उपाधि जित्न सफल भएको हो । 

निकै रोमाञ्चक बनेको फाइनलमा न्यूजिल्यान्डलाई हराउँदै इङ्ल्यान्ड भाग्यमानी सावित भयो । लर्डसमा टस जितेर पहिला ब्याटिङ गरेको पाहुना टोलीले निर्धारित ५० ओभरमा ८ विकेटको क्षतिमा २ सय ४१ रन बनायो । जवाफी ब्याटिङमा उत्रिएको घरेलु टोली इङ्ल्यान्डले २ सय ४१ रन बनाएपछि खेलको निर्णय सुपर ओभरमा गयो । 

सुपर ओभरमा पनि दुबै टोलीले बराबरी रन बनाए । बराबरी रनपछि धेरै बाउन्ड्री हान्ने नियमका आधारमा इङ्ल्यान्ड च्याम्पीयन बन्यो । 

च्याम्पीयन लगत्तै इङ्ल्यान्डका कप्तान इयोन मोर्गनले न्युजिल्यान्डको प्रशंसा गरे । उनले भने, “केन र उसको टोलीप्रति मेरो सहानुभूति छ । मलाई लाग्छ, फाइनल निकै कडा भयो । यस्तो पिचमा खेल्न निकै मुस्किल थियो । तर अन्तिमसम्म हामीले खेलेर देखायौं । निकै खुसी छौं ट्रफी उठाउन पाउँदा ।”

पराजित टोलीका कप्तान केन विलियम्सनले राम्रो प्रदर्शन गरेको बताए । “हामी टस जितेर पहिले बलिङ गर्न चाहन्थ्यौं । तर रन बनाउन चुनौतीपूर्ण होला भनेर पहिले ब्याटिङ रोज्यौं । फाइनलका लागि २५० सम्म ठिकै हुन्छ लागेको थियो । तर खेल निकै प्रतिस्पर्धात्मक रह्यो,” उनले भने । 

बाउन्ड्रीका आधारमा विजेता घोषणासँगै आयोजक अन्तरराष्ट्रिय क्रिकेट परिषद् (आईसीसी) को आचोलना भइरहेको छ । कस्तो नियम बनाएको होला भन्दै क्रिकेट समर्थक आईसीसीको आचोलना गरिरहेका छन् । 

विश्वकपको फाइनल चलिरहेको बेला विम्बल्डन टेनिसको उपाधिको लागि पनि प्रतिस्पर्धा भइरहेको थियो । रोजर फेडेरर र नोभाक जोकोभिक खेलिरहेका थिए । जसमा जोकोभिक जित निकाल्न सफल भए । समर्थकको नजर विश्वकप र विम्बलडनमा थियो । 

लगत्तै विम्बल्डनले आईसीसीलाई मेन्सन गर्दै ट्वीट गर्यो । ट्वीटमा लेखिएको थियो, ‘हेलो आईसीसी, तिमी कसरी खेल सकिएको नाटक गर्छौ ?

केही समयपछि क्रिकेट विश्वकपले ट्वीट गर्यो । जसमा लेखिएको थियो, ‘एक विजेता र दुई च्याम्पीयन ।’ बेलायती प्रधानमन्त्री टेरिजा मेले पनि ट्वीट गरेर इंग्ल्यान्डलाई बधाइ दिइन्, सेलिब्रेसन गरेको भिडियोसहित । 

बधाईसँगै आचोलना भइरहेका बेला भारतीय पूर्वक्रिकेटर गौतम गाम्भिरले पनि आईसीसी नियमको आलोचना गरे । उनले ट्वीटमा लेखे, “विजेताको निर्णय धेरै बाउन्ड्री हान्ने आधारमा भयो, आईसीसीको यो बेतुकको नियम हो । खेल बराबरी हुनुपथ्र्यो । दुवै टिमलाई बधाई दिन्छु, जसले राम्रो खेल खेले । विजेता दुवै हुन् ।’

हालै सन्यास घोषणा गरेका अर्का भारतीय पूर्वक्रिकेटर युवराज सिंहले पनि आईसीसी नियमको आलोचना गरे । “म यो नियमसँग सहमत छैन । तर नियम त नियम नै हो । इंग्ल्यान्डलाई बधाई छ । मेरो सहानुभूति किवीसँग छ । अन्तिमसम्म राम्रो खेल्यो ।”

इङ्ल्यान्डले पहिलो पटक विश्वकपको उपाधि जित्दा विश्व क्रिकेटले २३ वर्षपछि नयाँ च्याम्पीयन पाएको हो ।