काठमाडौं । घरेलु मैदानमा आयोजना हुन १३ औं दक्षिण एसियाली खेलकुद (साग)का लागि महिला फुटबल टोलीको प्रशिक्षण आगामी आइतबारबाट सुरु हुने भएको छ । वर्षाको समय र अभ्यासका लागि मैदान नपाएपछि महिला टोलीको प्रशिक्षण ढिलोगरी सुरु हुन लागेको हो ।
चैतमा म्यानमारमा भएको ओलम्पीक छनोटको दोस्रो चरणपछि महिला टोलीले कुनै पनि अन्तरराष्ट्रिय प्रतियोगितामा सहभागिता जनाएको छैन । यद्यपि खेलाडीले आफू आबद्ध क्लब र प्रदेशबाट आठौं राष्ट्रिय खेलकुद प्रतियोगितामा सहभागिता जनाएका थिए ।
मुख्य प्रशिक्षक हरि खड्का आठौं राष्ट्रिय खेलकुद र काठमाडौंमा भएको उपमेयर कपबाट उत्कृष्ट खेलेका खेलाडीलाई प्रशिक्षणमा बोलाउने तयारीमा छन् । राष्ट्रिय खेलाडीसँगै राम्रो प्रदर्शन गरेका ४० खेलाडीलाई प्रशिक्षणमा बोलाइएको खड्काले बताए ।
उनले भने, “तयारीका लागि ढिलो भइसकेको छ । मैदान पनि पाइएन । आइतबारबाट तयारी सुरु गर्छौं,” उनले भने । उनका अनुसार महिला टोलीको प्रशिक्षण बेलुकाको समयमा एन्फा कम्प्लेक्समा हुनेछ । सागअघि महिला टोलीले सेप्टेम्बरमा अन्तरराष्ट्रिय मैत्रीपूर्ण खेल खेल्ने प्रशिक्षक खड्काले बताए । “मैत्रीपूर्ण खेलको व्यवस्था गर्न एन्फा सकारात्मक छ । किर्गिस्तान र ताजकिस्तानमध्ये एक टोलीसँग मैत्रीपूर्ण खेल खेल्नेछौं,” प्रशिक्षक खड्काले भने ।
महिला टोलीले पछिल्लो समय राम्रो नतिजा ल्याइरहेको छ । गत चैतमा सकिएको पाँचौं महिला साफ च्याम्पीयनसिपमा उपविजेता बनेको टोलीले भारतमा सम्पन्न हिरो वुमेन्स गोल्डकपमा भारतमाथि ऐतिहासिक जित निकालेको थियो । यस्तै ओलम्पीक छनोटको दोस्रो चरणसम्मको यात्रा तय गरेको थियो ।