काठमाडौं । काठमाडौं महानगरपालिका–१६ का वडाध्यक्ष मुकुन्द रिजालको किर्ते हस्ताक्षर गरेको अभियोगमा एक सेवाग्राही पक्राउ परेका छन् । ती सेवाग्राहीलाई वडा कार्यालयले किर्ते हस्ताक्षर गरेर काजगात तयार पारिरहेको अवस्थामा फेला परेपछि प्रहरीलाई बुझाइएको हो । 

प्रहरीले किर्ते हस्ताक्षर गरेको अभियोगमा बालालुस्थित अटोपार्टस्का कर्मचारी रविन खत्रीलाई हिरासतमा राखिएको पुष्टि गरेको छ । वडाध्यक्ष रिजालले आर्थिक वर्षको अन्त्यमा व्यवसाय नवीकरण गर्ने प्रयोजनका लागि फर्जी हस्ताक्षर गरेर वडा कार्यालयमा फाइल पेश गरेको पाइएपछि उनलाई पक्राउ गरिएको जानकारी दिए ।

“उहाँको डकुमेन्ट नपुगेकाले डकुमेन्ट तयार गरेर ल्याउनुस् भनिएको थियो । तर, उहाँले मेरो डुब्लिकेट साइन गरेर फाँटमा गएर काम गर्न खोजेको फेला परेपछि हामीले प्रहरीलाई बुझाएका हौं,” वडाध्यक्ष रिजालले भने । 
महानगरीय प्रहरी वृत्त सोह्रखुट्टेका प्रहरी नायव उपरीक्षक सन्तोषसिंह राठौरले उनलाई हिरासतमा राखेर अनुसन्धान भइरहेको भन्दै थप कुरा अहिले नखुलेको बताए ।