काठमाडौं । कंगोका युद्ध सरदर बोस्को एन्टिएगान्डालाई अन्तर्राट्रिय फौजदारी अदालत (आईसीसी)ले यौन दासताको अपराधमा अपराधी ठहर गरेको छ । फ्रिडम युनाइटेड नामक संस्थाका अनुसार आईसीसीले यौन दासताको अभियोगमा अपराधी ठहर गरेको यो पहिलो घटना हो । बोस्कोमाथि महिला तथा बालबालिकालाई आफ्नो फौजमा बलजफ्ती भर्ती गरेको र यौन शोषण गरेको अभियोगमा मुद्दा चलाइएको थियो । उनीमाथि बाल सैन्य प्रयोग गरेकोलगायत बलात्कार, हत्या जस्ता अनेकौं जघन्य अपराधमा मुद्दा चलाइएको थियो ।
सन् २०१३ मा आईसीसीसमक्ष आत्मसमर्पण गरेका बोस्कोको मुद्दामा यही जुलाई ८ का दिन निर्णय गरिएको हो । सन् २००२ र २००३ मा भएका दुईवटा घटनामा भएको अपराधमा उनले नेतृत्व गरेका लडाकुहरू संलग्न रहेको पाइएपछि बोस्कोलाई ‘अप्रत्यक्ष पीडक’ ठहर गरी सजाय दिइएको हो । बेलायतको पत्रिका गार्जियनलाई उद्धृत गर्दै फ्रिडम युनाइटेडले लेखेको छ – क्रूरता र हिंसाका कारण ‘टर्मिनेटर’ का नामले कुख्यात बोस्कोलाई १३ वटा युद्ध अपराध र ५ वटा मानवताविरुद्धको अपराधमा मुद्दा चलाइएको थियो । उनलाई सजाय सुनाउन बाँकी । बोस्कोलाई जन्मकैदको सजाय हुनसक्ने बताइएको छ ।