लण्डन । दुईवर्ष भन्दा कम उमेरका नेपाली शिशुहरुले आफूलाई चाहिने क्यालोरीको एक चौथाइ हिस्सा ‘जंक फुड’बाट प्राप्त गरिरहेको एउटा अन्तर्राष्ट्रिय अध्ययनले देखाएको छ । बिस्कुट, क्रिस्प, इन्स्टान्ट नुडल्स र गुलिया पेय पदार्थले भिटामिन, मिनरल्स र अन्य महत्वपूर्ण पौष्टिक पदार्थबाट शिशुलाई बञ्चित गर्ने काम गरेको पछिल्लो अध्ययन प्रतिवेदनले देखाएको छ । जबकि उनीहरुलाई पौष्टिक पदार्थ अत्यावश्यक हुन्छ ।
न्यूट्रिसन नामक जर्नलमा सो अनुसन्धान रिपोर्ट प्रकाशित भएको छ । प्रतिवेदनमा २१ औं शताब्दीको ‘जंक फुड’ डाइट अहिले विश्वभरी नै फैलिँदै गएको जनाउँदै त्यसले मोटोपना बढाउनुका साथै शिशुको बृद्धिमा पनि असर गरिरहेको जनाइएको छ ।
यो सम्बन्धी अध्ययन काठमाडौं उपत्यकामा गरिएको र सो अनुसन्धानमा ७४५ जना बालबालिकाका अभिभावक संलग्न रहेको जनाइएको छ ।
बालबालिकालाई ‘जङ्कफुड’ दिनु चुरोट खुवाउनुजस्तै हो
ती बालबालिका १२ देखि २३ महिनाको बीचका भएको प्रतिवेदनमा उल्लेख छ । यस खालको अध्ययन गरिबीमा रहेका मुलुकमा पौष्टिक पदार्थको अवस्था र साना बालबालिकाको स्वास्थ्य सम्बन्धी पहिलोपटक गरिएको जनाइएको छ । सो अनुसन्धान विश्वव्यापी स्वास्थ्य संस्था हेलेन केलर इन्टरनेसनलले गरेको हो ।
अध्ययनका क्रममा ती बालबालिकामध्ये आधाले उनीहरुलाई चाहिने क्यालोरी उच्च मात्राको चिनी, उच्च मात्राको नुन र उच्च मात्राको फ्याट स्न्याक्सबाट पाइरहेको जनाइएको छ । उनीहरुको बृद्धि र विकासका लागि पौष्टिक पदार्थको तह अपर्याप्त भएको समेत प्रतिवेदनमा जनाइएको छ । उनीहरुको बृद्धि र विकासको लागि चाहिने अत्यावश्यक पौष्टिक पदार्थ प्रोटिन, क्याल्सियम, आइरन, भिटामिन ए र जींकको मात्रा नै कम भएको समेत प्रतिवेदनमा उल्लेख छ ।
यसबाट प्राप्त तथ्यले नीति निर्मातालाई खतराको घण्टी बजाउने अपेक्षा गरिएको द एसेसमेन्ट एण्ड रिसर्च अन चाइल्ड फिडिङ्ग प्रोजेक्टका प्रिन्सिपल इन्भेस्टिगेटर डा. अलिसा प्राइजले बताएकी छन् । (द गार्जीयन)
