वाशिङटन । अमेरिकी संसद सिनेटका अल्पसंख्यक समूहका नेता   चुक सुमेरले अहिले चल्तीमा आएको फेस एपको अनुसन्धान गर्न आग्रह गरेका छन् । सो एपले कम उमेरको वा बढी उमेरको फोटो बनाउने काम गरिरहेको छ । ट्विटरमा एक पत्र प्रस्तुत गर्दै सुमेरले यो कामलाई गहिरो चिन्ताको विषय भएको बताएका छन् । 

यसबाट कुनै पनि अमेरिकी नागरिकको व्यक्तिगत तथ्यांक विदेशी शक्तिमा जाने उल्लेख गरेका छन् । गोपनियताको चासो भएको भन्दै उनले संकेत गरेको सो एप अहिले विश्वव्यापी रुपमा भाइरल भइरहेको छ ।

फेस एपले यसअघि आफू माथि लगाइएको आरोप खण्डन गरेको थियो । रसियाको सेन्ट पिटसवर्गमा रहेको वायरलेस ल्याब कम्पनीले आफूले स्थायी रुपमा नै तस्वीरहरु भण्डारण नगर्ने बताएको छ । यसैगरी डेटाहरु पनि संकलन नगर्ने जनाएको छ । प्रयोगकर्ताले अपलोड गरेको फोटोलाई आफूले अपलोड मात्रै गर्ने समेत सो कम्पनीले जनाएको छ । कम्पनीको आर एण्ड डी टिम रसियामा रहेपनि डेटा रसियालाई उपलब्ध नगराइने कम्पनीको वक्तव्यमा दाबी गरेको छ ।  यद्यपि सुमेरले एफबीआई र फेडरल ट्रेड कमिसनले फेस एपको छानबिन गर्नुपर्ने माग गरेका छन् ।  

(बीबीसी)