काठमाडौं । न्यायपरिषद्ले एकै पटक २३४ न्यायाधीश सरुवा गरेको छ । परिषद्ले बिहीबार निकालेको सरुवा सूचीअनुसार उच्च अदालतका ७८ र जिल्ला अदालतका १ सय ५६ न्यायाधीश सरुवा भएका छन् । 

यसरी सरुवा हुने न्यायाधीशहरुमा जिल्ला र उच्च अदालतमा लगातार दुई वर्ष कार्य गरिसकेकाहरु छन् । परिषद्को सिफारिसमा प्रधानन्यायाधीश चोलेन्द्रशमशेर राणाले सरुवा गरेका हुन्। परिषद्का अध्यक्ष स्वयं प्रधानन्यायाधीश नै हुने व्यवस्था छ । 

त्यस्तै, परिषद्ले विशेष अदालतको अध्यक्ष र सदस्यमा पनि उच्च अदालतका न्यायाधीशहरुलाई तोक्ने निर्णय गरेको छ । विशेष अदालतको अध्यक्षमा उच्च अदालत दिपायलका न्यायाधीश शिवराज अधिकारीलाई ल्याइएको छ ।  विशेष अदालतको 'सेट' नै परिवर्तन भएको छ । 

सदस्यहरुमा उच्च अदालत सुर्खेतका न्यायाधीश कृष्ण गिरी, उच्च अदालत दिपायलकै न्यायाधीश वालेन्द्र रुपाखेती, उच्च अदालत सुर्खेतकी न्यायाधीश शान्तिसिंह थापा, उच्च अदालत जनकपुरका न्यायाधीश चन्द्रबहादुर सारु र उच्च अदालत विराटनगर, इलाम इजलाशका न्यायाधीश डा. रवि शर्मा अर्याल तोकिएका छन् ।