काठमाडाैं । कैलालीको धनगढी उपमहानगरपालिकास्थित चटकपुरमा भएको विस्फोटमा एकजनाको मृत्यु भएको छ । बिहीबार बेलुका उक्त स्थानमा बम विस्फोट हुँदा पाँचजना घाइते भएका थिए । घााइतेमध्ये एकजनाको उपचारका क्रममा मृत्यु भएको कैलाली प्रहरी प्रमुख एसपी सुदीप गिरीले जानकारी दिए ।
उनका अनुसार घाइते भएका राम सिंहको उपचारका क्रममा मृत्यु भएको हो ।
मृत्यु भएका सिंह विप्लव समूहका कार्यकर्ता भएको प्रहरीले जनाएको छ । बिहीबार बेलुका पौने सातबजे स्थानीय निलम होटेलमा विष्फोट हुँदा होटेल सञ्चालक केशवराज पाण्डेयसहित पाँचजना घाइते भएका थिए । विष्फोटमा परी ठेगाना खुल्न नसकेका लक्ष्मण सेरेला, मोबिन खान, जीतेन्द्र यादव घाइते भएको जनाइएको छ ।
घाइते भएका होटल सञ्चालक पाण्डेको अवस्था पनि गम्भीर रहेको प्रहरीले जानकारी दिएको छ ।
होटेलमा चिया खान बसेकाले बोकेको बम विष्फोट भएको प्रारम्भिक अनुसन्धानबाट पत्ता लागेको प्रहरीले जनाएको छ । घटनास्थलबाट चाइनिज पेस्तोल बरामद गरिएको र अनुसन्धान भइरहेको प्रहरी प्रधान कार्यालयका प्रहरी उपरीक्षक रमेश थापाले जानकारी दिएका छन् । प्रहरी स्रोतका अनुसार बम धनगढी हुँदै पहाडी जिल्लातिर लैजान लागेको र उक्त होटलमा खाना खान छिरेका बेला झोलामा रहेको बम विस्फोट भएको प्रहरीले अनुमान गरेको छ ।
बम त्रुटिबस विस्फोट भएको बताइएको छ ।
