काठमाडौं । मुलुकभर असारमा १२१ लैङ्गिक विभेदमा आधारित महिला हिंसाका घट्ना भएको तथ्याङ्क अभिलेखीकरण गरिएको छ । महिला पुनःस्थापना केन्द्र (ओरेक) ले आज असारको मासिक प्रतिवेदन सार्वजनिक गर्दै यस अवधिमा ५७ घरेलु हिंसा, २७ बलात्कार र १४ सामाजिक हिंसाका घटना भएको जनाएको छ ।
त्यस्तै १० हत्या, छ यौनदुर्व्यवहार, तीन बलात्कारको प्रयास, दुई मानव बेचविखन, एक लैङ्गिक विभेदका कारणले आत्महत्याको प्रयास र एक अनलाइनमार्फत हिंसा भएको तथ्यांक संकलन गरिएको छ ।
उमेरका आधारमा हेर्दा सबैभन्दा धेरै ३७ जना १७ देखि २५ वर्ष उमेर समूहका, ३२ जना २६ देखि ३५ वर्ष उमेर समूहका, २९ जना १६ वर्षभन्दा कम उमेरका र १० जना ३६ देखि ४५ वर्ष उमेर समूहका महिला हिंसाबाट प्रभावित रहेका देखिएका छन् ।
प्रभावित र आरोपितको सम्बन्धलाई विश्लेषण गर्दा सबैभन्दा बढी ४८ हिंसा श्रीमान्बाट भएका, २१ छिमेकीबाट र १९ परिवारका सदस्यबाट भएका पाइएको आरेकले जनाएको छ । - रासस
