काठमाडौं । पछिल्लो समय नेपाली समाजमा खेलकुदप्रतिको मोह बढ्दो छ । त्यसैमा क्रिकेटतर्फ आकर्षित हुनेको संख्या उल्लेख्य रुपमा वृद्धि भएको छ ।
स्वास्थ्यसँगै शारीरिक फिटनेस कायम राख्न खेलले मद्दत गर्ने भएकै कारण धेरै अभिभावकले आफ्ना सन्तानलाई खेलकुदमा केन्द्रित गर्न चान्छन् । पछिल्लो समय नेपाली क्रिकेटले पछ्याइरहेको सफलताले पनि नेपाली समाजमा धेरै अभिभावक आफ्ना सन्तानलाई ब्याट र बलमा रमाउन सिकाइरहेका छन् ।
युवा क्रिकेटर सागर ढकालको परिवार पनि ‘क्रिकेट क्रेजी’ छ । त्यही कारण उनी क्रिकेटतर्फ आकर्षित भए । परिवारमा देखिएको क्रिकेट मोहले उनलाई यस क्षेत्रमा लाग्न सहज भयो ।
पारस खड्कालगायतका नेपाली क्रिकेटरको खेल टिभीमा स्क्रिनमा देखिने विश्व क्रिकेटरका कीर्तिमानले उनलाई क्रिकेट खेलाडी नै बन्ने सपना जाग्यो । त्यसो त सबैका सपना एकैसाथ पूरा हुँदैनन् तर सागरको सपना सफलतातर्फ उन्मुख छ । नेपाली क्रिकेटका उदाउँदा तारा सागर ढकाल नेपाली युवा क्रिकेट क्षेत्रमा बलियो सम्भावना बोकेका खेलाडीमध्येका एक हुन् ।
हिमालयन क्रिकेट एकेडेमीका उत्पादन सागर केही समयअघि सम्पन्न एसीसी यू–१९ इस्टर्न रिजन क्रिकेट प्रतियोगितामा ‘प्लेयर अफ दी सिरिज’ बन्न सफल भए । त्यसयता सागरको धेरै चर्चा भयो । सागरको चर्चा घरेलु लिगहरुमा नचलेको भने होइन । घरेलु लिगको उत्कृष्ट प्रदर्शनले राष्ट्रिय जर्सी लगाउने अवसर पाएका उनी डट बल फाल्नमा माहिर छन् । उनको प्रदर्शनबाट सागर नेपाली क्रिकेटमा धेरै सम्भावना बोकेका खेलाडीको रुपमा परिचित छन् ।
गुल्मीको सत्यवती गाउँपालिकामा जन्मिएका सागर सानैदेखि क्रिकेटमय वातावरणमा हुर्किए । उनको परिवारमा क्रिकेटप्रतिको मोह धेरै नै थियो । सबैजना क्रिकेट भनेपछि हुरुक्कै । “सानैदेखि दाइहरु (नेपाली क्रिकेटका राष्ट्रिय खेलाडी) ले क्रिकेट खेलेको देख्थेँ । म पनि गाउँमा क्रिकेटका सामग्रीहरु जुटाएर त्यसैमा रमाउँथेँ । काठमाडौं आउँदा सुरुवातमै यसरी क्रिकेटमा लाग्छु भन्ने त लागेको थिएन, तर पढाइभन्दा क्रिकेटमा नै धेरै ध्यान गयो,” सागरले भने ।
काठमाडौंको हिमालयन क्रिकेट एकेडेमीमा करिब चार वर्ष बिताएका सागर अहिले विभागीय क्लब नेपाल पुलिसमा आबद्ध छन् । सागर अब क्रिकेट बाहेक अरु सोच्ने मनसायमा छैनन् ।
पढाइका लागि काठमाडौंमा आएका उनी साथीको संगतमै सिफल चौरमा क्रिकेट खेल्न थाले । सागरलाई सिफल हुँदै हिमालयन क्रिकेट एकेडेमीसम्म साथीहरुले नै पुर्याए ।
“सुरुआतमा म मेरो क्रिकेट क्षमताबारे अन्जान थिएँ । काठमाडौंमा आएपछि वास्तविक क्रिकेट क्षमताबारे ज्ञान भयो । हिमालय क्रिकेट एकेडेमी मेरो क्रिकेटको पहिलो पाइला हो । त्यसपछि मैले दैनिक अभ्यास गर्न थालेँ । सुरुमा नै बलिङ गर्छु भन्ने लागेको थिएन । पछि प्रशिक्षक रुपेश श्रीवास्तवले बलिङमा नै राम्रो देखेपछि मलाई बलिङ मात्र गर्न भन्नुभयो र, म त्यसैमा रमाउन थालँे,” सागरले भने ।
सागर क्रिकेटमा विकेट लिनेभन्दा डट बल फाल्न माहिर छन् । उनको ‘इकोनमी रेट’ निकै राम्रो छ । यू–१९ इस्टर्न रिजन क्रिकेट प्रतियोगिता अवधिभर उत्कृष्ट बलिङ गरेका सागरले चार खेलमा १५ विकेट लिएका थिए । नेपालको जितमा उनले महत्वपूर्ण योगदान दिए ।
एकेडेमीको चार वर्षीय यात्राले निखारिएका सागर भन्छन्, “पहिलो पटक क्रिकेट खेल्दा सफलता मिल्छ भन्ने लागेकै थिएन । पहिलो अन्तरराष्ट्रिय प्रतियोगिता खेल्दा केही अप्ठ्यारो पनि भयो । तर राम्रो खेलेँ । घरेलु प्रतियोगिता र देशका लागि खेल्दा निकै फरक पर्ने रहेछ । त्यतिबेला त देशका लागि केही गरौँ भन्ने सोच मात्र आउने रहेछ ।”
यू–१९ विश्वकप छनोटको तयारीमा रहेको नेपालले भारत र अफगानिस्तानसँग मैत्रीपूर्ण सिरिज खेलेका थियो । उक्त सिरिज सागरका लागि यू–१९ टोलीको डेब्यू खेल थियो । सिरिजमा सागरले पाँच खेलमा तीन विकेट लिएका थिए ।
घरेलु क्रिकेट प्रतियोगितामा पनि उनको प्रदर्शन उत्कृष्ट छ । २०७५ मा पहिलो पटक प्रधानमन्त्री कप खेलेयता सागरले विभिन्न फ्रेन्चाइज लिगमा सहभागिता जनाएका छन् ।
उनी यतिबेला एसिया कप क्रिकेटको तयारीमा व्यस्त छन् । “नेपाललाई एसिया कप क्रिकेटको उपाधि दिलाउने योजना छ । जसको लागि मिहिनेत गरिरहेका छौं । हेरौँ के हुन्छ ? तुलतान्मक रुपमा भारत हामीभन्दा बलियो टोली छ । तर, पहिलेको जस्तो हाम्रो टोली पनि कमजोर छैन,” सागरले भने ।
यू–१९ एसिया कप क्रिकेट श्रीलंकामा पाँच सेटेम्बरबाट १४ सेटेम्बरसम्म आयोजना हुनेछ । एसिया कपमा नेपाललगायत आयोजक श्रीलंका, भारत, पाकिस्तान, बंगलादेश, अफगानिस्तान, यूएई र कुवेतले सहभागिता जनाउने छन् । सागरको अबको लक्ष्य राष्ट्रिय टोली हो । नेपाली टोलीमा स्थान बनाउनेबारे सागर आफ्नो प्रदर्शनमा भर पर्ने बताउँछन् ।
“अबको लक्ष्य राष्ट्रिय टोलीमा स्थान बनाउने हो । त्यसका लागि मैले आफ्नो खेलमा धेरै परिवर्तन र मेहेनत गर्न आवश्यक छ । उत्कृष्ट प्रदर्शन गर्न सके छिट्टै राष्ट्रिय टोलीमा पर्न सक्छु,” सागरले भने ।
