काठमाडौं । सत्तारूढ नेपाल कम्युनिस्ट पार्टी (नेकपा)को शक्ति सन्तुलनमा फेरबदल आइरहेका बेला स्कुल विभागमा पूर्वमाओवादी केन्द्र लचिलो बनेको छ । स्कुललगायत अन्य विभागको जिम्मेवारी बाँडफाँटको विषयलाई लिएर अध्यक्षद्वय केपी शर्मा ओली र पुष्पकमल दाहाल छलफलमा जुटिरहेका बेला पूर्वमाओवादी केन्द्रबाट यस्तो धारणा आएको हो ।
स्कुल विभागमा सचिवालय सदस्य ईश्वर पोखरेल र नारायणकाजी श्रेष्ठबीच रस्साकस्सी छ । प्रचण्ड निकट एक स्थायी कमिटी सदस्यले बाह्रखरीसँग कुरा गर्दै स्कुल विभागको विषयमा अब धेरै गलफती नहुने बताएका हुन् । “स्कुल विभागका विषयमा बाहिर प्रचार गरिएजस्तो विमति, विवाद छैन । दुई अध्यक्ष बसेर स्कुललगायत सबै विषयको टुङ्गो लगाउनुहुन्छ,” उनले भने ।
स्कुल विभागको दाबीबाट नारायणकाजी पछि हटेको हो त ? भन्ने बाह्रखरीको जिज्ञासामा ती नेताले भने, “स्कुल विभागमा जो भए पनि एक जना हुने हो, मै हुनुपर्छ भनेर कसैले पनि भनेको छैन । भन्नु हुँदैन ।”
उता स्थायी कमिटी सदस्य देवेन्द्र पौडेलले पनि बुधबार (आज) बस्ने सचिवालयको बैठकले केही निकास दिने विश्वास व्यक्त गरे । सचिवालयको बैठक दिउँसो ३ बजे डाकिएको बताउँदै उनले एकीकरणलाई धेरै लम्ब्याउन नहुने धारणा राखे ।
यसैबीच पार्टी महासचिव विष्णु पौडेलले जिम्मेवारी नपाएका सचिवालयदेखि केन्द्रीय कमिटी सदस्यसम्म सबै नेताको कार्यविभाजनबारे आफ्नो मत, रुची, चाहना बुझेका छन् । कसैलाई भेटेर र धेरैलाई फोन सम्पर्कमार्फत् रुची र चाहना बुझेर त्यसलाई प्रतिवेदनको रूप दिइएको पौडेल निकट स्रोतले जानकारी दियो ।
साउन १३ गते बसेको सचिवालय बैठकले केन्द्रीय कमिटीका सदस्यहरूलाई कार्यविभाजनबारे एकसरो राय बुझ्ने निर्णय गरेको थियो । तर, स्थायी कमिटी सदस्य यो सोधाइ कर्मकाण्डी हुने संशय व्यक्त गर्छन् ।
“फोन गरेर बुझेर महासचिवले जिम्मेवारी त पूरा गर्नुभएको छ, तर यो सोधाइ औपचारिकतामा मात्रै सीमित हुने सम्भावना उत्तिकै छ । सबैको रुची चाहना समेटेर निर्णयमा पुग्न कठिन नै हुन्छ,” उनले भने ।