काठमाडौं । अस्कर कलेज अफ फिल्म स्टडिजका विद्यार्थीले अभिभावकलाई पनि चलचित्रबारे बुझाउने भएका छन् । अस्कर कलेज अफ फिल्म स्टडिजले आउँदो शनिबार अभिभावकलाई फिल्म मेकिङबारे जानकारी दिन लागेको हो ।
ओपन हाउस इभेन्टमा अस्कर कलेज अफ फिल्म स्टडिजमा पढ्ने विद्यार्थीका अभिभावकलाई पनि फिल्म निर्माणका मुख्य विधामा जानकारी गराइनेछ । कलेजले गत सालबाट ओपन हाउस इभेन्टको सुरु गरेको हो । यसमा एक दिनका लागि चलचित्रका विभिन्न विधाको बारेमा जानकारी गराइन्छ । यस अवसरमा सर्वसाधारणले पनि कलेज वा युनिभर्सिटीका बारेमा प्रत्यक्ष जानकारी लिन पाउँछन् ।
कलेज तथा युनिभर्सिटीका बारेमा आम मानिसलाई एक मुष्ट जानकारी दिन विदेशमा ओपन हाउस इभेन्ट गर्ने प्रचलन छ । अस्कर कलेज अफ फिल्म स्टडिजले यसकै सिको गरेको हो ।
त्रिभुवन विश्वविद्यालयबाट सम्बन्धन लिई ब्याचलर लेभलको कोर्स पढाउँदै आएको कलेजले शनिबार आगन्तुकलाई चलचित्र निर्माणको सुरुआतदेखि पछिल्लो समयको प्रविधि भीएफएक्सका बारेमा जानकारी गराउनेछ । ओपन हाउस इभेन्टमा कलेजका विद्यार्थी, अभिभावक तथा सर्वसाधारणले सहभागिता जनाउन पाउने कलेजका एकेडेमिक निर्देशक मनोजबाबु पन्तले जानकारी दिए । पन्तले चलचित्र निर्माणको सम्पूर्ण प्रक्रिया उक्त इभेन्टमा राखिने छ । पन्तले भने, “एउटा फिल्म हलमा लाग्नुभन्दा अगाडि के–के काम हुन्छ, यो दिन थाहा पाउन सकिन्छ ।”
इभेन्टमा क्यामराको विकासक्रमलाई पनि सहभागीले अवलोकन गर्ने अवसर पाउनेछन् । कलेजले नेपालमा लामो समय प्रचलनमा रहेको सुपर सिक्स्टिनदेखि रेडहुँदै ड्रोन क्यामरासमेत प्रदर्शनका लागि राख्नेछ । क्यामरासँगै इभेन्टमा सहभागीलाई अभिनयको अनुभव पनि गराइने छ । कलेजका विद्यार्थीले आगन्तुकलाई अभिनयको शैली बुझाउन आफैंले अभिनय गरेर देखाउनेछन् ।
इभेन्टमा विद्यार्थीले खिचेका तस्बिर पनि प्रदर्शनीमा राखिने एकेडेमिक कोअर्डिनेटर नव श्रेष्ठले जानकारी दिएका छन् । उनका अनुसार ओपन हाउसकै समयमा अस्कर कलेजकै विद्यार्थीले बनाएका सर्ट फिल्म पनि देखाइने छ ।