‘फिल्म कल्चर’ विकास गर्न वीरगन्जमा चलचित्र महोत्सव

 ‘फिल्म कल्चर’ विकास गर्न वीरगन्जमा चलचित्र महोत्सव

काठमाडौं । चलचित्र दिवसको अवसर पारेर नेपाल चलचित्र निर्माता संघले प्रदेश नं. २ मा चलचित्र महोत्सव आयोजना गर्ने भएको छ । प्रदेश नं. २ को वीरगन्जमा असोज १ बाट ३ गतेसम्म चलचित्र महोत्सव आयोजना गरिने भएको हो ।  

महोत्सवमा चलचित्रहरु प्रर्दशन गरिनुका साथै निर्माणमा सहयोग पुर्याउने उद्देश्यले वर्कसप समेत राखिने चलचित्र निर्माता संघका अध्यक्ष आकाश अधिकारीले जानकारी दिए । 

“दिनको तीनवटाका दरले चलचित्र देखाउँछौं । दुईटाका दरले फरक खालका चलचित्र देखाएर त्यसमा छलफल चलाउने छौं,” अध्यक्ष अधिकारीले बाह्रखरीसँग भने । 

औधोगिक नगरी विरगन्जलाई चलचित्र नगरी बनाउने उद्देश्य रहेको भन्दै उनले सातवटै प्रदेशमा महोत्सव गर्दै जाने बताए । “नेपालभरका सबै कला, संस्कृति र साहित्य हाम्रै हुन् । वीरगन्जको कला संस्कृति काठमाडौंले थाहा पाउनुपर्छ, काठमाडौंको कला संस्कृति वीरगन्जले जान्नु पर्छ भन्ने हाम्रो उद्देश्य हो । तराई–मधेसका छुटेका विषय केन्द्रबाट बन्ने चलचित्रले समेट्नु पर्छ भन्ने पनि हाम्रो लक्ष्य हो,” अध्यक्ष आकाशले भने, “बजार खोज्ने त मुख्य लक्ष्य त हो नै । फिल्म कल्चर देशभर विकास हुनुपर्छ भन्ने हाम्रो जोड पनि हो ।” 

‘तराई पहाड हिमालको उत्सव नेपाली चलचित्र स्वर्णिम महोत्सव–२०७६’ नाम दिइएको महोत्सवमा ठूलो संख्यामा कलाकारहरुको उपस्थिती रहने उनले बताए ।  यसका लागि निर्माता संघले प्रदेश नम्बर २ का मुख्य मन्त्री लालबाबु राउत लगायतसँघ भेटेर छलफल गरिसकेकाे छ । 

महोत्सवलाई चलचित्र विकास बोर्ड तथा नेपाल उद्योग बाणिज्य महासंघले सह–आयोजना गर्दैछन् । 

 

प्रतिकृया दिनुहोस
ad