काठमाडौं । साताको चौथो दिन बुधबार सेयर कारोबार मापन गर्ने नेपाल स्टक एक्सचेन्ज (नेप्से) परिसूचकमा ५ अंकको गिरावट आएको छ । ५.१७ अंकले घटेर १ हजार २ सय २५.९० अंकमा पुगेको छ नेप्से । सेन्सेटिभ इन्डेक्स पनि १.२२ अंकले घटेर २ सय ६५.९३ अंकमा पुगेको छ ।
आज बजारमा १६९ कम्पनीका १० लाख ६९ हजार ६९० कित्ता सेयर २५ करोड ७२ लाख ८ हजार ५०१ रुपैयाँमा कारोबार भयो । कारोबारमा आएका १२ वटा समूहगत उपसूचकमध्ये माइक्रोफाइनान्स समूह ०.१४ अंकले उकालो लाग्यो भने अन्य सबै समूह ओरालो लागे ।
बजारमा नेपाल बैंकको कारोबार सबैभन्दा धेरै भयो । कम्पनीको सेयर २ करोड १० लाख ६२ हजार ५ सय ४१ रुपैयाँमा कारोबार भएको हो । विजय लघुवित्तका लगानीकर्ताले सबैभन्दा धेरै कमाए । कम्पनीको सेयर मूल्य ४.२६ प्रतिशतले बढेको हो ।