सिउल । उत्तर कोरियाले दक्षिण कोरियासँग शान्ति वार्ता गर्न अस्वीकार गरेको छ । वार्ता हुन नसक्नुमा दक्षिण कोरियाका गतिविधि पूर्णरुपमा जिम्मेवार भएकोसमेत उसले आरोप लगाएको छ । दक्षिण कोरियाका राष्ट्रपति मुन जाइले विहीबार दिएको अभिव्यक्तिलाई लिएर उत्तर कोरियाले प्रतिक्रिया जनाएको हो । शुक्रबार बिहानै उत्तर कोरियाले पूर्वी तटको समुद्रमा दुईवटा मिसाइलको टेस्ट फायर गरेको दक्षिण कोरियाको सेनाले जनाएको छ । एक महिनाको बीचमा गरिएको यो छैठौं परीक्षण हो ।
उत्तर कोरियाले उसको आणविक परीक्षणका कारण अन्तर्राष्ट्रिय जगतबाट नाकाबन्दी व्यहोरिरहेको छ ।
दक्षिणले के भनेको थियो ?
दक्षिण कोरियाका राष्ट्रपतिले जापानी शासनबाट कोरियाको स्वतन्त्रताका सन्दर्भमा विहीबार आयोजित कार्यक्रममा बोल्दै कोरियन उपमहादीपको एकता आगामी २०४५ सम्ममा हुने जनाएका थिए । दोस्रो विश्व युद्धको समाप्तीसँगै दुई वटा कोरिया बनेका हुन् ।उनले सम्बोधनका क्रममा शान्ति र वैभवयुक्त नयाँ कोरिया पूर्वी एशिया र विश्वले नै प्रतिक्षा गरिरहेको बताएका थिए ।
उत्तर कोरियाले भने अमेरिकासँग संयुक्त सैन्य अभ्यास गर्ने तर शान्तिपूर्ण अर्थतन्त्र वा शान्तिपूर्ण शासन भन्ने अधिकार दक्षिण कोरियालाई नभएको वक्तव्यमा जनाएको छ । (बीबीसी)