मिस नेपाल अर्थ २०१८ प्रिया सिग्देल साझा विवेकशील पार्टीबाट राजनीतिमा प्रवेश गरेकी छन् । साउन २६ गते प्रेस विज्ञप्ति जारी गरी उनी पार्टीमा आवद्ध भएको औपचारिकरुपमा जानकारी दिइएको हो । उनलाई साझा पार्टीको केन्द्रीय सदस्यमा मनोनित गरिएको छ ।
सिग्देल विगत ६ वर्षदेखि ‘हात्तीहात्ती’ नेपालमा संस्थापक अध्यक्षका रुपमा पिछडिएका महिलाहरुको लागि काम गर्दै आइरहेकी छन् । विकास र राजनीतिमा स्नातक गरेकी प्रिया आफ्नो त्यही पढाइले राजनीतिमा लाग्न प्रेरणा मिलेको बताउँछिन् ।
मिस नेपालहरु प्रायः ग्ल्यामर वर्ल्डमै प्रवेश गर्छ भन्ने आममान्यतालाई गलत साबित गर्दै उनले बिलकुल फरक बाटो रोजेकी छन् । उनको अध्ययन, रुचि, राजनीतिमा युवा संलग्नतालगायतका विषयमा सिग्देलसँग बाह्रखरीकर्मी वर्षा महर्जनले गरेको कुराकानीको सारः
ग्लामर दुनियाँबाट राजनीतिमा लाग्नुभएको छ, कस्तो प्रतिक्रिया पाउनुभयो ?
म ‘नर्मलाइजेसन’ अवधारणामा विश्वास गर्छु । अधिकांश मिस नेपालहरु चलचित्र क्षेत्रमा जान्छन् भन्ने आममान्यता छ । मिस नेपालहरुले अन्य बाटो रोज्दा त्यति धेरै चासो हुँदैन, तर म राजनीतिमा आउँदा चासो बढेको छ । सबै शुभचिन्तकहरुले अप्ठ्यारो बाटो रोज्नुभयो भन्ने चिन्ता व्यक्त गर्नुभएको छ । डेभलपमेन्ट र राजनीतिमा स्नातक गरेको मैले विगत छ वर्षदेखि महिला सशक्तिकरणको क्षेत्रमा काम गरिरहेकी छु । राजनीतिमा आउनु भनेको पनि सिस्टममा काम गर्ने मेरो प्रयास हो । मजस्तै युवालाई फ्रन्टलाइनमा ल्याउनु खोजेको हो । कुनै दिन म राजनीतिमा आवद्ध हुन्छु भन्ने सोच पहिलादेखि नै थियो । जुन २०१९ मा आएर पूरा भयो । यो सुरुवात हो, म सिक्दै छु ।
घरपरिवार पनि राजनीतिक पृष्ठभूमिबाटै हुनुहुन्छ ?
छैन । म राजनीतिमा आएको देखेर मेरा बुवा–आमा एकदम अचम्भित हुनुभएको छ । उहाँहरुले कहिले पनि सोच्नुभएको थिएन, उहाँहरुकी छोरी राजनीतिमा जान्छे भनेर । म राजनीतिमा लाग्ने परिवारकै पहिलो व्यक्ति हो ।
साझा पार्टीमै चाहिँ किन ?
आफूले काम गर्ने ठाउँको वातावरण कतिको सहज छ र पछिसम्म त्यही संस्थासँग लागिरहन सकिन्छ कि सकिन्न भन्ने कुरा हेर्नुपर्छ । साझा पार्टीको सिद्धान्त मन प¥यो र वातावरण सहज लाग्यो । र, अर्को महत्वपूर्ण कुरा मलाई पार्टीले स्पेस दियो । राजनीतिमा आउने सोच तीन–चार वर्ष अघिदेखि थियो । मैले सबै राजनीतिक पार्टीहरुलाई बाहिरबाट नियालिरहेको थिएँ । संयोगवश साझा पार्टी अगाडि आयो र मेरो सिद्धान्तसँग पार्टीको सिद्धान्त मिल्यो । जसका कारण आज म साझा पार्टीसँग आवद्ध छु ।
ग्ल्यामरमा एउटा हाइट बनाएपछि राजनीतिमा आउन सहज भएकोले सुरुमा त्यता जानुभएको हो ?
जसरी हाम्रो अन्तरिम प्लान हुन्छ, त्यसैगरी ग्ल्यामर मेरो अन्तरिम प्लान थियो । ६ वर्ष भैसक्यो मैलै महिला सशक्तिकरणको क्षेत्रमा काम गरेको । तर मजस्तो युवालाई राज्यले गर्ने व्यवहार सकारात्मक पाइएन । मेहनत गर्ने युवाहरुलाई प्रोत्साहन नभएको पाइयो । त्यसपछि मैले अध्ययन गर्दै जाँदा त्यसका लागि उपयुक्त प्लेटर्फम मिस नेपाल थियो । त्यसकारण म त्यता गएको हो । जसले मलाई थप परिमार्जन हुने अवसर दियो । मिस नेपालको ताज नजिते पनि मैले जीवनोपयोगी ज्ञान र जीवन बुझ्ने कला सिक्ने अवसर पाएँ ।
मलाई हरेक कुरा सिस्टममा चल्नुपर्छ भन्ने लाग्छ । सिस्टमलाई व्यवस्थित गर्ने भनेको राजनीतिले हो । त्यसकारण म मिस नेपालबाट राजनीतिमा आएको हो ।
राजनीतिप्रति युवाको वितृष्णा बढेको छ नि ?
हो, अहिलेको युवा पुस्तालाई राजनीतिप्रति विश्वास नै छैन । ‘पोलिटिक्स इज अ डर्टी गेम’ एन्ड ‘आई हेट पोलिटिक्स’ भनेर हुर्किरहेको छ अहिलेको युवापुस्ता । जसको अपवाद म पनि होइन ।
लामो समयसम्मको राजनीतिक अस्थिरता, नेताहरुले काम र कुराको तालमेल नमिलाउँदा विश्वास गुम्दै जानु, लामो पर्खाइपछि पनि कुनै सम्भावनाहरु नदेखिनुलगायतका कारणले युवापुस्ताको वितृष्णा बढेको हो ।
अर्को महत्वपूर्ण कुरा, राजनीतिक दलहरुले युवालाई स्थान दिएनन् । नेताहरुले युवालाई आफूअनुकुल प्रयोग गर्ने र स्वार्थ पूरा भएपछि छोड्ने कारण पनि राजनीतिप्रति वितृष्णा बढेको हो । मैले राजनीतिसँगसँगै डेभलपमेन्ट विषय पढेँ, जसले मेरो ज्ञानको दायरालाई फराकिलो बनाइदियो । यसकारण पनि राजनीतिप्रतिको मोह बढेको हो । अबको १०–२० वर्षपछिको नेपाल त हामीले बनाउने हो । यही कारण हामी युवा देशको हरेक पाटोमा अगाडि आउनुपर्छ ।
हामीजस्तो युवाले राजनीतिमा चासो नराख्नु भनेको हाम्रो आफ्नै कमजोरी हो । राजनीति मन पर्दैन भन्ने सोच परिवर्तन गर्नु आवश्यक छ ।
युवाहरुलाई राजनीतिमा ल्याउन के गर्नुपर्ला ?
राजनीति खराब खेल हो र त्यसमा जाने व्यक्ति पनि खराब नै हुन्छ भन्ने सोचलाई हटाउन आवश्यक छ । मेरो मुख्य उद्देश्य भनेकै राजनीतिलाई हामीजस्तो युवाबीच सामान्य बनाउनु हो । राजनीतिमा हाम्रो ठाउँ छ भनेर बुझाउने प्रयास हुन्छ मेरो ।