काठमाडौं । प्रधानमन्त्री केपी शर्मा ओलीले सत्यनिरुपण तथा मेलमिलाप र बेपत्ता छानबिन आयोग यही हप्ताभित्र गठन भइसक्ने बताएका छन् । आइतबार प्रतिनिधिभामा समबोधन गर्दै प्रधानमन्त्री ओलीले आयोगमा प्रमुख आयुक्त र आयुक्त सिफारिस गर्नका लागि गठित समिति क्रियाशिल रहेको पनि बताए ।
“प्रमुख आयुक्त, आयुक्त सिफारिस गर्न समिति गठन गरेका छौं । सिफारिस समिति क्रियाशिल छ । मैले विश्वास लिएको छु, यसै हप्ताभित्र सत्य निरुपण तथा मेलमिलाप र बेपत्ता छानबिन आयोग गठन हुनेछ,” उनले भने । सिफारिस समितिले सिफारिस गर्नासाथ सरकारले ढिला नगरी आयोग गठन गर्ने उनको प्रतिवद्धता थियो ।
“हामीले द्वन्द्व व्यवस्थापन गरेको यतिका समय भइसक्दा पनि द्वन्द्वका खाटाहरु बाँकी नै रहनु र तिनीहरुलाई सम्झिएर कतै चित्त दुख्ने, कतै घाउ चहर्याउने स्थिति हुनु वाञ्छनिय होइन,” उनले भने ।