काठमाडौं । सत्तारुढ नेपाल कम्युनिस्ट पार्टी (नेकपा) को सचिवालय बैठक एजेन्डामा प्रवेश नै नगरी सकिएको छ । बैठकमा प्रधानमन्त्रीसमेत रहेका अध्यक्ष केपी शर्मा ओलीले भारतीय विदेशमन्त्री एस जयशंकरसँग भएको आफ्नो भेटका बारेमा जानकारी गराएका थिए ।
“बैठकमा प्रधानमन्त्री ओलीले भारतीय विदेशमन्त्री जयशंकरसँग भएको भेटका बारेमा जानकारी गराउनुभयो । महत्वपूर्ण विषयमा भने प्रवेश गरिएन,” नेकपाका वरिष्ठ नेता झलनाथ खनालले भने ।
प्रवक्ता नारायणकाजी श्रेष्ठले सचिवालय बैठकमा नेकपा महानगरपालिकाको अध्यक्ष र सचिव चयनको विषय प्रवेश भएको बताए । उनले बिहीबार बिहान बस्ने बैठकले यसका बारेमा टुंगो लगाउने जानकारी दिए ।
नेकपाले छवटा महानगरपालिकामा पार्टीका इञ्चार्ज र सह–इञ्जार्ज तोके पनि अध्यक्ष र सचिव तोक्न बाँकी छ । प्रवक्ता श्रेष्ठका अनुसार बैठकमा प्रवास कमिटि गठनका बारेमा पनि छलफल सुरु भएको छ ।