एकातिर पाकिस्तानका प्रधानमन्त्री इमरान खान काश्मीरको स्वायत्तता समाप्त गरेको विरोधमा विश्वभरका मुस्लिम देशहरुलाई एक्तावद्ध गर्ने प्रयासमा छन् । अर्कोतर्फ मध्यपूर्वको अहम् मानिने इस्लामिक देश संयुक्त अरब ईमिरेट्स (यूएई) ले भारतीय प्रधानमन्त्री नरेन्द्र मोदीलाई आप्mनो सर्वोच्च नागरिक सम्मान ‘अर्डर अफ जायेद’ बाट सम्मानित गरेको छ ।
१४ अगष्टमा पाकिस्तानी प्रधानमन्त्री इमरान खानले पाकिस्तान प्रशासित काश्मीरको मुजफ्फराबादमा संसदलाई सम्बोधन गर्दै भनेका थिए– काश्मीरको विषयमा विश्वभरका सवा अर्ब मुसलमान एकजुट छन् तर दुर्भाग्य शासक चुप छन् ।
अबुधाबीका क्राउन प्रिन्सले भारतीय प्रधानमन्त्री मोदीको यूएई भ्रमणमा क्रममा भनेका छन्– म अत्यन्तै कृतज्ञ छु, मेरा भाइ आप्mनो अर्को घर अबुधाबी (संयुक्त अरब ईमिरेट्सको राजधानी) आएका छन् ।
यसअघि यूएईले ‘अर्डर अफ जायेद’ सम्मानबाट रूसी राष्ट्रपति भ्लादिमीर पुटिन, महारानी एलिजाबेथ द्वितीय र चीनका राष्ट्रपति शी जिनपिङलाई मात्र सम्मानित गरेको थियो । ‘अर्डर अफ जायेद’ सम्मान ग्रहणपछि मोदीले आफूले गौरवान्वित महसुस गरेको प्रतिक्रिया दिएका छन् ।
उता पाकिस्तानमा यो घटनाक्रमलाई लिएर राजनीतिदेखि मिडियासम्म चर्चा चुलिएको छ । पाकिस्तानी मिडियामा काश्मीरमा भारतले एकतर्फी निर्णय गरेकै समयमा यूएईले सम्मानित गरेको भन्दै आलोचना भइरहेको छ ।
पाकिस्तानको प्रमुख अखवार ‘डन’ ले लेखेको छ, “अर्डर अफ जायेदमा मोदीको ईन्ट्रीले संयुक्त अरब ईमिरेट्सका लागि भारतले कुन महत्व राख्दछ भन्ने कुराको पुष्टि भएको छ । भारत कच्चा तेलको तेस्रो ठूलो आयातकर्ता देश हो । भारत विश्वको ठूलो उपभोक्ता बजारमा एक हो र यूएईमा ठूलो संख्यामा भारतीय काम गर्छन् । यद्यपि कयौं एक्टिभिस्टहरुलाई यूएईको यो कदम चित्त बुझेको छैन । बेरूतका एक मानवाधिकारकर्मी समाह हदीदले लेखेका छन् कि खाडीका कयौं देश आर्थिक फाइदाका आधारमा मोदीको विरोध गर्न सकिरहेका छैनन् । उनीहरु मानवाधिकार उल्लंघनका अगाडि आर्थिक अवसरलाई महत्व दिइरहेका छन् ।”
यूएईले भारतीय प्रधानमन्त्री मोदीलाई उक्त सम्मान दिएको केही घण्टापछि नै पाकिस्तानी सीनेटका अध्यक्ष सादिक सनर्जानीले यूएई भ्रमण रद्द गरेका छन् । सादिकले आफ्नो बयानमा भनेका छन्, “मोदीको निर्णयका कारण काश्मीरी मुसलमानमाथि अन्याय भइरहेको छ । उनलाई यूएईले आफ्नो सर्वोच्च नागरिक सम्मान दिएको छ । यस्तो अवस्थामों यूएई जानु काश्मीरी आमा, बहिनी र वृद्धवृद्धाप्रति अन्याय हुन्छ ।”
बीबीसी