मुम्बई । बलिउडकी चर्चित अभिनेत्री विद्या बालनको भनाइ छ धर्म र विज्ञानमा मतान्तर वा टकराव हुनुको साटो दुवै एकैसाथ रहन सक्छन् ।
विद्या बालनले समाचार एजेन्सी पीटीआईलाई दिएको अन्तर्वार्तामा भनेकी छन्, एक व्यक्तिको पहिचान अनेकौ हुन सक्छ । तर जसरी मानिसले धर्मलाई आफ्नो सुविधा अनुसार तोडमोड गरेको देखिँदै आएको छ, त्यो आफैंमा ठूलो समस्या हो ।
विद्या भन्छिन्, “मलाई लाग्छ जसरी मानिसले धर्मको व्याख्या गरिरहेका छन्, त्यही नै समस्या हो । मैले कतिपय यस्ता मानिस पनि देखेकी छु, जसले आफू धार्मिक भएको भन्दैनन् । त्यसबाट पन्छिँदै आएका छन् । म पनि त्यसैमध्येको एक हुँ । मलाई हरसमय यस्तो लाग्थ्यो, म कसैलाई नबताउँ कि म धार्मिक हुँ । म आफूलाई आध्यात्मिक बताउँछु । आज धर्मलाई एक किसिमको नकारात्मक विषयका रुपमा हेर्न थालिएको छ । किनभने धार्मिक हुनु असहिष्णु हुनु जस्तो भइदिएको छ ।”
फिल्म ‘मिशन मंगल’मा विद्या बालन तारा शिन्देको भूमिकामा देखिएकी छन् । उनको यो पात्रले विज्ञानमाथि विश्वास त गर्छ नै, साथै विज्ञानभन्दा पर ईश्वरको शक्तिमा पनि विश्वास गर्छ ।
विद्या बालन भन्छिन्, “अहिले ‘म’ र ‘तिमी’को बहस चुलिँदै गएको छ । यसले गर्दा ‘हामी’को अवधारणा कमजोर बन्दै गएको छ । यस्तो केवल हाम्रो मात्रै देशमा मात्रै भइरहेको छैन । सारा विश्व ‘तिमी’ हैन ‘म’ को लडार्इँमा उल्झिएको छ । यसको परिणामकै कारण ‘हामी’ को अवधारणा कमजारे हुँदै गएको हो । मलाई आश्चर्य लागि रहेको छ कि यस्तो किन भइरहेको छ ? संशोधन कम हो वा संशोधन भएर पनि त्यहाँसम्म मानिसको पहुँच कम हुँदै गएको हो ? अथवा मानिसको चाहना त्यस्तो हुँदैगएको हो ! संशोधन तिनले ति व्यक्तिलाई मात्रै बाँड्न चाहेका छन् जसलाई धर्म, भाषा, क्षेत्र वा नस्लका आधारमा आफ्नो नजिक पाउँछन् । सायद यसै कारण मानिस गोलबद्ध भइरहेका छन् !...”
विद्या भन्छिन्, “हामीले आफैसँग यो प्रश्न गर्नुपर्ने अवस्था छ कि हाम्रो विचार कति स्वतन्त्र छ । स्वतन्त्रता कहाँ छ ? मलाई लाग्छ, हामी स्वतन्त्र रहन चाहन्छौँ तर अरुलाई नियन्त्रणमा पनि राख्न खोज्छौँ । मेरा लागि यो स्वतन्त्रता होइन । कतिपय गलत कुरा जुन हाम्रा अगाडि घट्दै आएका छन्, त्यो देखेर रिस उठ्छ । ट्वीटरमै पनि हेर्नुस्, केही भन्यो कि मानिस रिसाइहाल्छन् ।”
विद्या बालन अभिनीत फिल्म मिशन मंगल प्रदर्शनमा आइसकेको छ । यस फिल्ममा अक्षय कुमार, विद्या बालन, तापसी पन्नु, सोनाक्षी सिन्हा, नित्या मेनन, कीर्ति कुल्हारीको मूख्य भूमिका रहेको छ ।
विद्याका अनुसार उनको भूमिका एक गृहिणीको रहेको छ जो आफ्नो अनुभवलाई आफ्नो काममा प्रयोग गर्ने प्रयास गर्छिन् । विद्याले निर्देशक जगन शक्तिले गरेको अनुसन्धानमाथि पूर्ण विश्वास गरेको बताइन् ।
विद्या भन्छिन्, “मैले निर्देशककी बहिनीसँग कुरा पनि गरेँ । उनी इसरोमा काम गर्छिन् । मेरा लागि यो बुझ्नु जरुरी थियो कि उनी आफ्नो घर र अफिस अर्थात् घरकी गृहिणी तथा वैज्ञानिकका रुपमा कसरी सन्तुलन कायम गर्छिन् । फिल्मका लागि जगनले सयौं वैज्ञानिकहरूसँग भेटघाट गरेका थिए । र मिशनका लागि आवश्यक जानकारी बटुलेका थिए ।”
यस फिल्ममा भारत मंगलसम्म पुगेको यात्रा अर्थात् मार्स अर्बिटर मिशनको उपलब्धि देखाइएको छ । विद्या बालनको भनाई छ– यस्ता अरू पनि कथामा फिल्म बन्नुपर्छ ।
(बीबीसी)