काठमाडौं । सत्तारूढ नेपाल कम्युनिस्ट पार्टी (नेकपा) मा अध्यक्ष पुष्पकमल दाहाल ‘प्रचण्ड’को सक्रियता बढेको छ । अर्का अध्यक्ष केपी शर्मा ओली उपचारका लागि सिंगापुर गएसँगै कार्यकारी भूमिका निर्वाह गर्न पाएका प्रचण्डले नेताहरूबीच भेटघाटलाई तीव्रता दिएका छन् ।

अध्यक्ष प्रचण्डले शुक्रबार बिहान पार्टीका वरिष्ठ नेता माधवकुमार नेपालसँग भेटवार्ता गरे । नेता नेपाल पार्टीको पछिल्लो कार्यविभाजन तथा वरीयता हेरफेरप्रति असन्तुष्ट रहँदै आएका छन् । 

असन्तुष्टिकै बीच बसेको बिहीबारको सचिवालय बैठक पनि अध्यक्ष ओली र नेता नेपालबीच गलफत्तीमा परिणत भयो । पूर्वएमालेबीच बढेको ध्रुवीकरण र रिक्तता मेटाउन अध्यक्ष प्रचण्डले भूमिका खेल्न थालेको नेकपाका नेताहरु बताउँछन् ।

गएको पुसमा बसेको पार्टी स्थायी कमिटीको बैठकमा पनि प्रचण्डले यस्तै भूमिका निर्वाह गरेका थिए । गत मंसिर २९ गतेदेखि पुस १३ गतेसम्म चलेको बैठकमा ओलीको कार्यशैलीलाई लिएर पूर्वएमालेका नेताले चर्को आलोचना गरे । वामदेव गौतमले त १६ बुँदे लिखित धारणा नै पेस गरे ।

बैठकको अन्तिममा अध्यक्ष प्रचण्डले विवाद मत्थर पार्न मध्यमार्गी भूमिका खेलेका थिए ।

“पार्टीभित्रका नेताहरूसँग अनौपचारिक संवाद भइरहेको छ । पार्टीभित्र देखिएका असन्तुष्टि मिलाउन उहाँको प्रयत्न छ । तिक्तता मेटाएर जानुपर्छ भन्ने उहाँको मत छ,” पार्टी स्थायी कमिटी सदस्य देवेन्द्र पौडेलले भने ।

शुक्रबारको भेटमा भदौ एक गतेको निर्णयको सर्कुलर जारी गर्ने विषयमा छलफल भएको नेपाल निकट नेताहरूले जानकारी दिए । “शुक्रबारको भेटमा पछिल्लो निर्णयको सर्कुलर जारी गर्ने विषयमा छलफल भयो ।त्यस्तै, जनसङ्गठनमा केही सिनियर केन्द्रीय सदस्यलाई सहइन्चार्ज बनाउने बारेमा पनि अध्यक्ष र वरिष्ठ नेताबीच छलफल भएको छ,” नेपाल निकट स्रोतले बाह्रखरीसँग भन्यो ।

अध्यक्ष प्रचण्डले आइतबार बिहान राष्ट्रपति विद्या भण्डारीसँग पनि भेटवार्ता गरेका छन् । नेकपाभित्रको विवाद मिलाउनसमेत सक्रिय रहेकी भण्डारीसँग राजनीतिक गफ भएको बताइए पनि मूर्त कुरा बाहिर आएको छैन ।

तथापि राष्ट्रपतिसँगको भेटलाई पनि प्रचण्डको सक्रियतासँग जोडेर हेरिएको छ । प्रचण्ड निकट स्रोतले जानकारी दिएअनुसार सोमबार सचिवालयको बैठक बोलाउने तयारी छ । एकता प्रक्रिया अन्तिममा पुगे पनि नेकपाका दुई निकाय, जेष्ठ कम्युनिस्ट मञ्च, सल्लाहकार परिषद् गठन भएको छैन । कानुन, लेखा र अनुशासन आयोग पनि गठन भएको छैन ।

गत बिहीबारको सचिवालय बैठकले बैठक बसेर निर्णय गर्ने अधिकार प्रचण्डलाई दिएको छ । तर, सर्वसम्मतिले निर्णय गर्नुपर्ने अध्यक्ष ओलीको आग्रहअनुरूप प्रचण्डले नेताहरूसँग सल्लाह, परामर्श लिइरहेको उनी निकट स्रोतको दाबी छ ।

“अध्यक्ष प्रचण्डले बैठकको गृहकार्य गरिरहनुभएको छ, सचिवालयको बैठक छिट्टै बस्छ,” नेता पौडेलको भनाइ छ ।