काठमाडौं । विभिन्न सेवाहरु बिस्तारै डिजिटल रुपमा परिवर्तन भइरहँदा बजारको आवश्यक्तालाई मध्यनजर गर्दै फिटकिरी डटकम शुरु भएको छ । फिटकिरी डटकम निशुल्क अनलाइन बर्गिकृत विज्ञापन गर्न सकिने माध्यम हो । आफ्नो पुरानो तथा नयाँ सामानको विज्ञापन गर्नु परेमा प्रयोगकर्ताले फिटकिरी डटकममा निशुल्क खाता बनाइ सामान, सेवा तथा जागिरको विज्ञापन गर्न सक्ने कम्पनीले जारी गरेको विज्ञप्तिमा उल्लेख छ ।
अनलाइन सेवा फिटकिरी प्रयोगकर्ताले आफनो कम्प्युटर र मोवाइलबाट आफूलाई चाहिने पुरानो तथा नयाँ सामानहरु चयन गरि बिना एजेण्ट सिधा बिक्रेतासँग सम्पर्क गरि कारोबार गर्न सक्नेछन् । फिटकिरी डटकम एकदमै नौलो र सजिलो अनलाइन बर्गिकृत बिज्ञापन माध्यम भएको कुरा निर्देशक तुलसीराम पौडेलले बताए ।
एउटै विज्ञापनमा धेरै फोटोहरु अपलोड गर्न सकिने, सजिलै खोज्न सकिने, बर्गिकृत ट्याग र सफा डिजाइन फिटकिरी डटकमको बिशेषता रहेको कुरा पौडेल बताउँछन् । एकिकृत बर्गिकृत विज्ञापन सेवालाइ स्थापित गर्ने उद्देश्यले यो माध्यम विकास गरिएको जारी विज्ञप्तिमा जनाइएको छ । कर्मचारी चाहिएमा यो माध्यममा विज्ञापन गर्न र जागिर खान खोज्नेलाई जागिर खोज्न सकिने यसको अर्को मुख्य बिशेषता रहेको छ ।