काठमाडौं । पेस्तोल चोरीको अभियोगमा मुद्दा लडेका प्रहरी हवल्दार खुलबहादुर कुँवर ३० वर्षपछि निर्दोष सावित भएका छन् । सर्वोच्च अदालतले पेस्तोल चोरीको अभियोग खेपिरहेका कुँवरलाई सफाई दिएको हो । सर्वोच्च अदालतका न्यायाधीशद्वय विश्वम्भरप्रसाद श्रेष्ठ र प्रकाशमान सिंह राउतको संयुक्त इजलासले ०७५ फागुन २३ गते गरेकोसो फैसलाको पुर्णपाठ आएको छ । फैसलामा कुँवरलाई अन्याय भएको ठहर गर्दै क्षतिपूर्ति दिन आदेश गरिएको छ ।
उनलाई पेस्तोल चारीको अभियोगमा थुनामा राखिएको मितिदेखि अवकाश हुने मितिसम्मको कानुनबमोजिम प्रहरी सेवामा रहँदा प्राप्त हुने तलब भत्ता र निवृत्तिभरणको सुविधा प्रदान गर्दा न्यायपूर्ण हुने फैसलामा उल्लेख छ ।
फैसलामा भनिएको छ, “निजले प्राप्त गर्ने तलब, भत्ता र अन्य सुविधा प्रदान गरी कानुनबमोजिम प्राप्त गर्ने निवृत्तिभरणको रकमसमेत यो आदेश प्राप्त भएको मितिले दुई महिनाभित्र निवेदकलाई उपलब्ध गराउनु भनी विपक्षीहरूका नाममा परमादेशसमेत जारी गरिदिएको छ ।”
०४४ माघमा कुँवरमाथि पेस्तोल चोरीको आरोप लागेको थियो । ०४४ माघ देखि ०४८ सालसम्म उनी प्रहरीकै थुनामा राखिएका थिए । प्रहरी सिवशेष अदालतले उनलाई दोषी ठहर गर्दै चार वर्ष कैद र एक वर्षको तलब बराबरको जरिवाना गर्ने फैसला गरेको थियो ।
सो सजाय भोगिसकेपछि उनी सोविरुद्ध अदालत पुगेका थिए ।
