पेरिस । इरानका विदेशमन्त्री मोहम्मद जभाद जरिफ आइतबार जी ७ राष्ट्रको शिखर सम्मेलनमा अघोषित रुपमा आइतबार एक्कासी पुगेका छन् ।   अमेरिका र इरानबीच अहिले पानी बाराबारको अवस्था रहेको बेलामा उनको भ्रमणलाई अनौठो मानिएको छ ।  उनी त्यहाँ पुगेर एउटा साइड लाइन बैठकमा पनि सहभागी भएका थिए । 

समुद्री किनारको सहर बियार्रिजमा अमेरिकी राष्ट्रपति डोनाल्ड ट्रम्प सहितका विश्व नेताहरु सामेल भइरहेका छन् ।  मिडिया रिपोर्टमा जनाइएअनुसार अमेरिकी अधिकारीहरु इरानी विदेशमन्त्रीको उपस्थिति देखेर आश्चर्यचकित भएका छन् । इरानका विदेशमन्त्री जरिफले ट्विटरमा फ्रान्सेली विदेशमन्त्री र राष्ट्रपतिसँग आफ्नो रचनात्मक कुरा भएको जनाएका छन् । 

उनले जर्मन र बेलायती अधिकारीहरुलाई पनि ब्रिफ गरेको जनाउँदै अगाडिको बाटो अप्ठेरो भएपनि प्रयास जारी राख्ने जनाएका छन् ।  इरानी विदेशमन्त्रीले फ्रान्सका राष्ट्रपति इमानुएल म्याक्रोनसँग गएको शुक्रबार पेरिसमा भेटेका थिए । इरान र अमेरिकाबीचको सम्बन्ध वाशिङटन सन् २०१५को इरानको आणविक गतिविधि सिमित गर्ने सम्बन्धी एउटा सहमतिबाट बाहिरिएपछि तनावमा परेको हो ।  

५ वटा अन्य देशहरु  जसमा फ्रान्सपनि छ उनीहरु भने सो सम्झौतामा प्रतिबद्ध रहेका छन् । तर, इरानले भने अमेरिकाले नाकाबन्दीमा कडाइ गरेपछि अप्ठेरो महसुस गरिरहेको छ ।  इरानका विदेशमन्त्रीलाई गत महिना मात्रै अमेरिकाले व्यक्तिगत रुपमा पनि नाकाबन्दी लगाएको थियो । जी ७मा बेलायत, क्यानडा, फ्रान्स, जर्मनी, इटाली, जापान र अमेरिका रहेका छन् । यसपालिको बैठकमा भारतका प्रधानमन्त्री नरेन्द्र मोदीलाई पनि आमन्त्रित सदस्यको रुपमा डाकिएको छ । (बीबीसी)