समिक्षक र दर्शकबाट मिश्रित प्रतिक्रिया पाइरहेको चलचित्र ‘साहो’ ले बक्स अफिसमा भने कमाल देखाएको छ । प्रभास र श्रद्धा अभिनित चलचित्र ‘साहो’ ले पहिलो दिन घरेलु बजारमा १३० करोड भारुको व्यापार गरेको छ । चलचित्रले दोस्रो दिनमा पनि करोडको व्यापार कायमै राख्दै २२० करोड माथिको व्यापार गरेको हो ।
‘साहो’ले हिन्दी भर्सनमा भारतमा २४.४० करोड कमाएर २०१९ को पहिलो दिन सर्वाधिक कमाइ गरेको चलचित्रको तेस्रो स्थानमा पर्न सफल भएको हो । यो लिस्टको पहिलो स्थानमा ४२.३० करोड कमाएको ‘भारत’ र २९.१६ करोडको ‘मिशन मंगल’ छन् ।
दक्षिणमा चलचित्र ‘साहो’ ‘बाहुबली’ पछि दोस्रो अहिलेसम्मकै सर्वाधिक कमाइ गरेको चलचित्र बनेको छ । यो भन्दा अघि रजनीकान्त र अक्षय कुमार अभिनित चलचित्र ‘२.०’ दोस्रो सर्वाधिक कमाइ गरेको चलचित्र थियो । तर साहो ले ‘२.०’ लाई उछिन्न सफल बनेको हो ।
‘साहो’ ले तमिल र तेलुगु भाषामा पहिलो दिन ८७ करोड कमाइ गरेको हो  भने बाहुबलीले १२१.७२ करोडमा ओपनिङ गरेको थियो । 
३५० करोडमा बनेको ‘साहो’ भारतमा मात्रै चार हजार पाँच सय पर्दामा एकैसाथ प्रदर्शनमा आएको हो । पाँच देशमा छायांकन गरिएको ठूलो बजेटको चलचित्र ‘साहो’ निर्माणमा २ वर्ष लागेको थियो ।

बिजनेस टुडे