काठमाडौं । मानिसको सफलतामा एक विन्दु महत्वपूर्ण हुन्छ, जसले लामो समयका लागि उसको भाग्यरेखा कोरिदिन्छ । मिहिनेत र प्रयासलाई जारी राख्ने हो भने त्यो विन्दु अर्थात् टर्निङ प्वाइन्टले कुनै पनि व्यक्ति सफल मोडमा पुग्छ । खेलमा होस् या अन्य विधा, परिवर्तनका लागि कुनै न कुनै माध्यम टर्निङ प्वाइन्ट बन्न सक्छ ।

क्रिकेटर अविनाश बोहराको पनि यस्तै सफलतातिर लम्काउने एक विन्दु छ, जसले उनलाई एक क्रिकेट खेलाडीका रुपमा चिनाएको छ । एकदिवसीय अन्तर्राष्ट्रिय क्रिकेटको मान्यतापछि नेपालले गत माघमा युनाइटेड अरब इमिरेट्स (यूएई) सँग एकदिवसीय सिरिज र ट्वान्टी–ट्वान्टी सिरिज खेल्यो । दुवै सिरिज नेपालले जित्यो । त्यसमा पनि केही कीर्तिमान बने । 

रोहित पौडेलले सबैभन्दा सानो उमेरमा अर्धशतक बनाउने कीर्तिमान बनाउँदा अर्का यस्ता खेलाडी चम्किए । जो पहिलो अन्तर्राष्ट्रिय सहभागितामा ‘म्यान अफ दी सिरिज’ भएका थिए । अभिनासले यूएईविरुद्धको सिरिजमा समग्रमा ६ विकेट लिएका थिए । उनको इकोनोमी ७.२० रहेको थियो ।

घरेलु प्रतियोगितामा चम्केर राष्ट्रिय टोलीमा स्थान बनाएका अभिनासले आफ्नो पहिलो सहभागितामा उत्कृष्ट प्रदर्शन गरेर टोलीमा बलियो चुनौती पेस गरेका छन् । उनी अहिले निरन्तर राष्ट्रिय टोलीमा उत्कृष्ट प्रदर्शनका लागि मिहिनेत गरिरहेका छन् । 

संघर्षका ती दिन

भारतकाे शिमलामा जन्मिएका २२ वर्षिय अविनाश बोहरा विभागीय क्लब एपिएफमा आबद्ध छन् । राष्ट्रिय टोलीको यात्रापछि उत्साहित उनको क्रिकेटयात्रा भने सङ्घर्षपूर्ण छ । बुवा भारतमा जागिरे भएकै कारण सानो उमेरमा भारत गएका उनी भारतीय क्रिकेट वातावरणले प्रेरित भए । रहरले टेनिस खेल्ने उनी नेपाली क्रिकेटप्रति उत्तिकै जानकार थिए । भारतका साना–साना गल्लीमा क्रिकेट देख्दा ब्याट र बल समाउने अविनाश २०७१ सालमा नागरिकता बनाउन नेपाल आए ।

नागरिकताको उद्देश्य थियो भारतीय आर्मीमा भर्ति हुने । त्यसका लागि नागरिकता लगायतका कागजात जम्मा गरे । तर आर्मीको यात्रा तय गर्न भने सहज थिएन । आर्मीमा भर्ति हुन केही कागजात नमिल्दा उनको बाटो नेपाली क्रिकेटतर्फ मोडियो । उनले भने, “मलाई एउटा कागजात नपुगेर आर्मी बन्न नसकेको कुरामा पछुत्तो छैन् । देशका लागि केही गर्न पाएकोमा खुसी छु । त्यो समय आर्मी भएको भए सायद यो सफलता हात पर्ने थियो या थिएन,” उनी भन्छन् । 

आर्मीको सपना समाप्त भएपछि अभिनास नेपालगन्जमा बसे । सानिमाको घरमा क्रिकेटमैत्री वातावरण मिल्न थाल्यो । उनका दाइ तरुण बज्राचार्यले क्रिकेट खेल्न उनलाई हौसला प्रदान गरे । पारिवारिक अवस्था राम्रो नभएकै कारण सुरुआतमा क्रिकेट मोहलाई तोडेका उनी क्रिकेटतर्फ लम्किए । दुई दाइके सहयोगले नै उनको यात्रा राष्ट्रिय टोलीसम्म लम्किएको हो । 

कक्षा आठमा पढ्दै गर्दा उनले पहिलो पटक जिल्ला स्तरीय खेलमा खेल्ने मौका पाए । बाँके जिल्लाको टिमबाट उनले प्रतिनिधित्व गर्ने अवसर पाए । त्यहाँ खेलेका दुई खेलमा ९ विकेट लिन सफल भए । २०७१ सालबाट उत्कृष्ट शुरुवात भएको उनको क्रिकेट यात्रा यू–१९ क्रिकेट टोलीमा छनोट नहुनुदेखि लिएर नेपालका घरेलु लिगहरुमा उत्कृष्ट प्रदर्शन गर्नुसम्म रहन गयो । 

अविनाशले क्रिकेट खेल्न थालेको ६ वर्ष भयो । यो ६ वर्षे क्रिकेट यात्रामा उनले नेपाली राष्ट्रिय टोलीका पारस खड्कालाई धेरै पछ्याए । अविनाश आफ्नो क्रिकेट यात्रामा सफलतापछि नेपाली राष्ट्रिय क्रिकेट टोलीका सदस्य शरद भेषावकर, वसन्त रेग्मी, पूर्व खेलाडी शक्ति गौचन र पारस खड्काको निकै ठूलो भूमिका रहेको उनी बताउँछन् । 

“सुरुमा क्रिकेट खेल्ने सपना थियो तर क्रिकेटमा लाग्न प्रेरणा दिने मान्छे भने थिएन । पछि नेपालगन्जमा आउँदा दाइले सहयोग गरेपछि मलाई सहज भयो । क्रिकेटमा नै लागेर यो ठाउँसम्म पुग्छु भन्ने त लागेको थिएन तर केहि हदसम्म सफलता पाउँछु भन्ने आशा चाहिँ हराएको थिएन,” अविनाशले भने । 

जिल्लास्तरीय प्रतियोगितामा उनले गरेको उत्कृष्ट प्रदर्शनका आधारमा उनलाई नेपाली टोलीका हालका कप्तान पारस खड्काले एपीएफमा बोलाएका थिए । अविनाशले एपीएफबाट २०१७ को प्रधानमन्त्री कप क्रिकेट खेल्ने मौका पाए । त्यसमा उनले उत्कृष्ट प्रदर्शन गरे । 

अविनाश भन्छन्, “सुरुवाती दिन निकै असहज थियो । एपीएफमा आउँदा पनि पारिश्रमिक धेरै थिएन । मलाई पैसाभन्दा पनि खेलको लागि धेरै मिहिनेत गर्ने अवसर थियो । आफ्नो प्रदर्शन भन्दा अन्य कुरामा ध्यान दिइन मैले । त्यसपछि घरेलु प्रतियोगितामा ध्यान गयो ।”

अविनाश एकताका नेपाली यू–१९ को बन्द प्रशिक्षणमा पनि नपरेका भने होइनन् । तर खेलमा कमजोरी देखाउँदै उनी टोलीमा अटाउन भने सकेनन् । त्यसपछि घरेलु प्रतियोगिताहरुमा सीमित भए । त्यहाँ भने जमे । 

राष्ट्रिय टोलीमा डेब्यु 

नेपाली राष्ट्रिय टोलीमा स्थान बनाउन निकै चुनौती छ । किनकी अनुभवी खेलाडीसँग युवा खेलाडीले प्रतिस्पर्धा गर्नुपर्ने हुन्छ । अविनाश त्यसैमा तिव्र गतिका बलर । अहिले टोलीमा तिव्र गतिको बलर सोमपाल कामी छन् । अभिनास सोमपाल पछिको वैकल्पिक खेलाडी हुन् । राष्ट्रिय टोलीमा स्थान बनाउने खेलाडीमध्ये धेरै यू–१९ लेभलबाट आएका हुन्छ्न । अविनाशको हदमा भने फरक छ । 

उनी उमेर समूहमा प्रतिस्पर्धा नगरी सिधै राष्ट्रिय टोलीमा स्थान बनाएका खेलाडी हुन् । एक पटक यू–१९ को क्याम्पबाट बाहिरिएका उनी घरेलु लिगमा गरेको प्रदर्शनकै आधारमा राष्ट्रिय टोलीमा अटाएका हुन् । कप्तान पारस खड्काले क्याम्पमा बोलाएपछि राष्ट्रिय यात्रा त्यहिँबाट सुरु भयो । राष्ट्रिय टोलीमा परेको समयलाई सम्झँदै अविनाश भन्छन्, “मलाई त्यति चाँडै नेपाली राष्ट्रिय टोलीले विश्वास गरेकोमा धेरै खुसी लागेको थियो । पहिलो पटक टोलीमा पर्दा मलाई सुरुमा अचम्म लाग्यो कि यति ठूलो अवसर हात पर्यो । ईपीएलमा गरेको प्रदर्शन र क्याम्पमा भएको मेरो प्रदर्शन हेरेर म टिममा पर्छु जस्तो पनि लागेको थियो ।”

उनको अबको लक्ष्य टोलीको जितमा उत्कृष्ट प्रदर्शन गर्ने हो । टि–ट्वान्टी विश्वकपको अवसर गुमाए पनि अर्को विश्वकपको लागि तयार हुनुपर्ने अविनाश बताउँछन् । उनको सपना पनि टि–ट्वान्टी विश्वकप खेल्ने हो । अहिले अभिनास १३ औं दक्षिण एसियाली खेलकुद (साग)को तयारी गरीरहेका छन् । जहाँ क्रिकेट पहिलो पटक समावेश गरिएको छ ।