दुई सय वर्षअघिको समय पेन्टिङमा

दुई सय वर्षअघिको समय पेन्टिङमा

काठमाडौं । दुई सय वर्षअघिको काठमाडौं कस्तो थियो होला ? सीमित रुपमा पाइने श्यामश्वेत फोटो हेरेर केही अनुमान लगाउनमात्र सकिएला । 

कलाकार हरिप्रसाद शर्माले यथार्थवादी रंगीन पेन्टिङमार्फत् दुई सय वर्षअघिको काठमाडौं देखाउन खोजेका छन् । ४५ वटा बढेमान पेन्टिङ सजाइएको काठमाडौंको बबरमहलस्थित नेपाल कला परिषद्मा पुग्दा साँच्चिकै दुई सय वर्षअघि पुगेको भान हुन्छ ।

प्राचीन र मध्यकालीन काठमाडौंका सम्पन्न संस्कृति, इतिहास, वास्तुकला र जनजीवन पेन्टिङमार्फत् नै जिउने अवसर चित्रकारले बनाइदिएका छन् । ‘नेपाल थ्रु द एजेजः रिभाइभिङ एन्सियन्ट एण्ड मेडिएभल कल्चर एण्ड आर्किटेक्चर’ नामक चित्रकला प्रदर्शनी असोज ९ गतेसम्म चल्नेछ ।

त्यसबेलाका सांस्कृतिक सम्पदाको चित्रमय झाँकीका साथै नेपाली परम्परागत शैलीमा कलाको विकासक्रमका पृष्ठभूमि झल्किने तीन थिम ( जनजीवन, संस्कृति र महत्वपूर्ण इतिहास)मा पेन्टिङहरु प्रदर्शनीमा राखिएका छन् ।

प्रदर्शनीमा ८२ वर्षका शर्माले आफ्नो कलाजीवनमा कोरेका ४५ वटा पेन्टिङमध्ये चारवटा वाटर पेन्टिङ र बाँकी सबै ओयल पेन्टिङ रहेका छन् ।

लुम्बिनीमा अशोकको आगमन र अशोक स्तम्भ गाडेको, अरनिकोको चीन प्रस्थान, कैलाशकूट भवन, प्रताप मल्लले स्वयम्भूमा प्रतापपुर र अनन्तपुर नामको दुई शिखर शैलीका मन्दिर निर्माण गरेर ठूलो पित्त्तलको बज्र चढाउँदाको क्षण, पाँच वर्ष लगाएर बनाएको रानीपोखरीको पुरानो रुपलगायतका ऐतिहासिक क्षण र रुपलाई चित्रमा उतारिएको छ ।

“नेपालको हराएर गएको इतिहास, संस्कृति र जनजीवनका अवशेषहरुलाई चित्रमा उतार्न बुवाले एक कलाकारको कलममार्फत् काम गर्नुभएको छ,” हप्रिसादका छोरा विष्णुप्रसाद शर्मा बताउँछन् ।

निरन्तर अध्ययन ँगै क्यानभासमा विभिन्न रंग पेन्टिङ ब्रसले कलात्मक रुपमा उतार्दै जाँदा २५ वर्षसम्मको लगनले ४५ वटा निकै नै मनमोहक पेन्टिङहरु तयार गरिसकेका छन् ।

एउटा थिम तयार हुनेबित्तिकै बुवा–छोराको रिहर्सल शुरु हुन थाल्छ । सम्बन्धित विषयका किताब चित्र तथा स्थानमा गएर अध्ययन अवलोकन गरेर थिमसँग सम्बन्धित सबै सामग्रीले परिपूर्ण भएपछि सुरु हुन्छ– हरिप्रसाद शर्माको क्यानभासमा रंगसँग खेल्ने कार्य ।

काठमाडौं उपत्यकाको सभ्यताको विभिन्न आयामहरु निर्माण गर्न राजा र पहिलेका व्यतिmहरु, कलाकौशल झल्काउने सम्पदा निर्माण गरेका कलाकारहरुको प्रशंसनीय कौशललाई आफ्नो कलामार्फत् प्रस्तुत गर्न सके एकहिसाबले ऋण तिर्न सक्छु कि भन्ने मान्यताले यी पेन्टिङहरु हरिप्रसाद शर्माले कोरेका हुन् ।

११ वर्षको हुँदादेखि नै चित्रकलामा हात हालेका उनले जुद्धकला पाठशालामा चित्रकलाको सामान्य शिक्षा आर्जन गरेका थिए । त्यो बाहेक कुनै पनि कक्षा नलिएका उनी स्वअध्ययन र अभ्यासबाट जन्मेका कलाकार हुन् । कलाको जिवन्त चित्रण गर्ने उनी मदन भण्डारी राष्ट्रिय अवार्ड र अरनिको प्रज्ञा राष्ट्रिय अवार्ड लगायत थुपै्र राष्ट्रिय अवार्डबाट सम्मानित भैसकेका छन् ।

प्रतिकृया दिनुहोस
ad