दिपेश, रत्न, विकास र नविन क्वाटरफाइनलमा

दिपेश, रत्न, विकास र नविन क्वाटरफाइनलमा

काठमाडौं । एपीएफका दिपेश धामी, आर्मीका रत्नजित तामाङ, भोजपुरका विकास श्रेष्ठ र सेनाका नविन श्रेष्ठ योनेक्स सनराइज नवौं पुष्पलाल स्मृती र्‍याङ्किङ् राष्ट्रिय ब्याडमिन्टन प्रतियोगिताको अन्तिम ८ मा पुग्न सफल भएका छन् । उच्च १६ वरीयताका खेलाडीबीच भएको पुरुष एकलको लिग खेलमा चारैजना खेलाडी आआफ्नो समूहको शीर्ष स्थान हात पार्दै क्वाटरफाइनल प्रवेश गरेका हुन् ।

समूह ‘बी’का राष्ट्रिय च्याम्पियन दिपेश धामीले सेमिफाइनल प्रवेशका लागि समूह ‘डी’का उपबिजेता सेनाका रुकेश महर्जन संग प्रतिस्पर्धा गर्ने छन् । यस्तै समूह डीका विजेता सेनाका नविन श्रेष्ठले समूह बीका उपविजेता सेनाका प्रफुल महर्जनसँग प्रतिस्पर्धा गर्नेछन् ।

समूह ए मा रत्नले आफ्ना सबै तीन प्रतिद्वन्द्वीलाई पराजित गर्दै समूह विजेता भएका हुन् । उक्त समूहबाट उपविजेताका रुपमा पुलिसका जीवन आचार्यले अन्तिम आठमा स्थान बनाए । अब रत्नले समूह सीका उपविजेता पुलिसका सुनिल जोशीसँग प्रतिस्पर्धा गर्नेछन् । यस्तै समूह सीका विजेता विकासले ए का उपविजेता जीवन आचार्यको सामना गर्नेछन् ।

समूह एमा रत्नले पुलिसका जीवन आचार्यलाई २१ । ६, २१ । १०, एपिएफका सुमन लिम्बुलाई २१ । १०, २१ । १३ तथा गौतम सिंह कठायतलाई १९ । २१, २१ । ९, २१ । १४ ले पराजित गरे । यस्तै जीवनले एपिएफका सुमन लिम्बुलाई २१ । १८, २४ । २२ ले तथा गौतम सिंह कठायतलाई १५ । २१, २१ । १९, २१ । १४ ले हराए । एपिएफका गौतमले आफ्नै क्लबका सुमनलाई २१ । १५, २१ । १५ ले हराए ।

समूह बीमा दिपेश धामीले सेनाका प्रफुल महर्जनलाई २१ । १९, २१ । ९ ले तथा बाँकेका ईरफान अन्सारीलाई २१ । १४, २१ । १४ ले र प्रफुलले ईरफानलाई २१ । ११, २१ । १५ ले पराजित गरे । यस्तै समूह सीमा पूर्व राष्ट्रिय च्याम्पियन विकास श्रेष्ठले एपिएफका विजित थापामगरलाई २१ । १५, २१ । ९ ले तथा पुलिसका सुनिल जोशीलाई २१ । १७, २१ । १४ ले र सुनिलले विजितलाई २१ । १६, २१ । ९ ले पराजित गरे ।

समूह डी मा सेनाका नविन श्रेष्ठले सेनाकै रुकेश महर्जनलाई २१ । १५, २१ । १०ले तथा पुलिसका बिष्णु कटुवालबाट वाक ओभर पाए । पुलिसका बिष्णुले अस्वस्थताका कारण खेल परित्याग गरे पछि रुकेशलाई विजयी बनाईएको थियो ।

महिला उच्च १२ तर्फको एकलमा एपिएफकी जेशिका गुरुङ्ग र सुनैना मुखिया तथा सेनाकी अनुमाया राईले पनि अन्तिम ८ मा स्थान बनाए ।

प्रतिकृया दिनुहोस
ad