काठमाडौं । बाढी नियन्त्रण महाशाखाले आगामी तीनदिन प्रमुख र सहायक नदीहरुमा बहाव घट्ने जनाएको छ । बाढीको ठूलो जोखिम नरहेको र आज देशका सबै प्रमुख तथा मझौला नदीहरुमा बहाव सामान्य घट्ने तथा प्रायः सबै नदीहरुमा बहाव सतर्कता तह भन्दा तल हुने समेत महाशाखाको भनाइ छ ।
हाल देशभरी आंशिक तथा सामान्य बदली रहेको मौसम पूर्वानुमान महाशाखाको बुलेटिनमा उल्लेख छ । आज थोरै स्थानमा मात्रै मेघ गर्जन सहित वर्षा र चट्याङ् पर्न सक्ने समेत जनाइएको छ । शनिबार पनि केही स्थानमा सामान्य बदली हुने र पर्सि आइतबार पनि बदलीकै सम्भावना रहेको जनाइएको छ । आइतबार मध्य र पूर्वका केही स्थानमा भारी वर्षापनि हुन सक्ने पूर्वानुमान गरिएको छ ।
आगामी २४ घण्टामा थोरै स्थानमा मेघ गर्जन सहितको हल्का देखि मध्यम वर्षाको सम्भावना रहेको र पहाडी भूभागमा पहिरो जान सक्ने भएकोले सतर्क रहन पूूर्वानुमान महाशाखाले आग्रह गरेको छ ।