काठमाडौं । संविधानसभाबाट संविधान जारी भएको चार वर्ष पूरा भएको अवसरमा आज देशभर विभिन्न कार्यक्रमहरु भइरहेका छन् । सरकारले आजको दिनलाई राष्ट्रिय दिवसको रुपमा भव्य रुपमा मनाउन आह्वान गरेको थियो ।
आज संविधान दिवस मूल समारोह समितिले राजधानीमा विशेष समारोहको आयोजना गरेको छ । समारोहमा राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, पूर्वप्रधानमन्त्रीहरू, सभामुख, राष्ट्रियसभाका अध्यक्ष, संवैधानिक निकायका प्रमुखलगायतलाई आमन्त्रण गरिएको छ । त्यसैगरी बिहान राष्ट्रिय झण्डासहित र्याली आयोजना गरिएको छ भने विभिन्न सांस्कृतिक झाँकीहरु प्रदर्शन गरिएको छ । साँझ घरघरमा दिपावली गर्न सरकारले सबैलाई आग्रह गरेको छ ।