बीबीसी । भारतीय क्रिकेट टिमका पूर्व कप्तान महेन्द्रसिंह धोनी विश्वकपको सेमिफाइनलमा पराजित भएपछि क्रिकेट मैदानमा भएका भारतका खेलहरुमा देखिएका छैनन् । सेमिफाइनलमा धोनीले नराम्रो खेलेको, जानीजानी भारतलाई हराएको भन्दै भारतीय क्रिकेट समर्थकहरुले आलोचना गरेका थिए ।
धोनीले अब क्रिकेटबाट संन्यास लिनेछन् भनेर धेरैले अनुमान गरिसकेका छन् । तर संन्यासबारेमा धोनी स्वयम् अनि बीसीसीआई दुवै केही बोलेका छैनन् । विश्वकपको सेमिफाइनलमा भारत र न्यूजिल्यान्ड प्रतिस्पर्धा गरेका थिए । जुन खेलमा भारत न्यूजिल्यान्डसँग पराजित भएको थियो । अब यो कुरा पुरानो पनि भइसक्यो । पुरानो खेललाई कोट्याइरहनु राम्रो पनि होइन । पछिल्लो समयमा के अब अन्तर्राष्ट्रिय क्रिकेटबाट धोनीले संन्यास लिएका हुन् भनेर चर्चा हुन थालेको छ ।
तर भर्खरैमात्र भारतीय क्रिकेट टिमका कप्तान विराट कोहलीले ट्विटरमा फोटो हाल्दै भनेका छन्, “यो खेल मैले कहिल्यै भुल्ने छैन । त्यो रात विशेष थियो । यो मानिसले मलाई धेरै दौडाएको थियो ।” फोटो २०१६ को अस्ट्रेलियाविरुद्धको खेलको थियो । जुन खेलमा भारतले अस्ट्रेलियालाई पराजित गरेको थियो । फोटोमा धोनी मैदानमा उभिएका थिए भने विराट मैदानमा घुँडा टेकेर बसेका थिए । विराटको ट्विटले धेरैको मनमा शंका पस्यो कि अब धोनी संन्यास लिँदैछन् । तर धोनीकी पत्नी साक्षी सिंहले भने यो हल्ला मात्र हो भन्दै विराटको ट्विटमा मेन्सन गरेकी थिइन् ।
धोनीको ठाउँमा को आउला त ?
धोनीको ठाउँमा को आउला भन्ने प्रश्न त्यति जटिल प्रश्न भने होइन । धोनीको ठाउँमा ऋषभ पन्त तयार हँुदैछन् । धोनीले टेस्ट क्रिकेट त छोडिसकेका छन् । अब धोनीको तुलना पन्तसँग एकदिवसीय अनि टी–ट्वान्टीमा मात्र हुनसक्छ । विश्वकपमा पनि धोनी र पन्त सँगै खेलेका थिए । तर, यति चाँडै धोनी र ऋषभ पन्तको तुलना हुन सक्दैन ।
धोनीको टिम इन्डियामा किन यति धेरै प्रभाव भन्नेबारेमा कप्तान विराट कोहलीले धेरै पटक जवाफ दिइसकेका छन् । विराटले धोनी आफ्नो टिमको सबैभन्दा बढी अनुभवी खेलाडी भएको र उनी अमूल्य रहेको बताएका थिए । अब आउने विश्वकप टी–ट्वान्टी क्रिकेट प्रतियोगिताको लागि चुनावबाट टिम गठन गरिनेछ । टिममा जुन खेलाडी जिम्मेवारीका साथ खेल्छ, उही चुुनिने कुरामा दुईमत छैन । अब धोनी भारतीय क्रिकेट टिमबाट खेल्छन् कि खेल्दैनन् ? उनले संन्यास लिन्छन् कि लिँदैनन् ? यी सबै प्रश्नहरुको जवाफ समय आएपछि आफै मिल्नेछ ।
https://www.bbc.com/hindi/sport-49709327