अभिनेत्री सोनम कपूर लामो समयदेखि बलिउड क्षेत्रमा नयाँ–नयाँ प्रयोग गर्दै आइरहेकी छन् । बलिउडकी स्टाइलिस अभिनेत्रीको लिस्टमा सोनम पहिलो स्थानमा पर्छिन् । उनले डेढ वर्षअघि मात्रै व्यवसायी आनन्द आहुजासँग विवाह गरेकी थिइन् । सोनमले सामाजिक सञ्जालमा पोस्ट गर्ने तस्बिरहरुबाट अनुमान लगाउन सकिन्छ, उनी आहुजासँगको वैवाहिक सम्बन्धमा निकै खुशी छिन् भनेर ।

उनी आफ्नो विवाह, करिअर, चलचित्र र अभिनेत्रीहरुलाई हुने भेदभावका विषयमा सधैं कुरा उठाउँछिन् । केही दिनअघिमात्रै उनले नारीका पक्षमा आफ्नो विचार व्यतm गरेकी थिइन् । यससँगै उनले आफनो वैवाहिक सम्बन्धको विषयलाई पनि सार्वजनिक गर्ने गरेकी छन् । यसै सन्दर्भमा भारतीय सञ्चारमानध्यम ‘नवभारत टाइम्स’ले सोनम कपूरसँग गरेको कुराकानीको अनूदित अंशः

विवाहपछि आफू परिवर्तन भएको कत्तिको महसुस गर्नुहुन्छ ?
विवाह भएको डेढ वर्षपछि म यति भन्न सक्छु कि तपाईंले आफनो बेस्ट फ्रेन्डसँगै विवाह गर्नुपर्छ, जसरी मैले गरेको छु । हेर्नुहोस् माया त हुन्छ, तर यदि मित्रता भएन भने तपाईंहरु एकअर्कालाई इज्जत र सम्मान गर्न सक्नुहुन्न । म निकै खुशी महसुस गरिरहेकी छु ।

सफल वैवाहिक सम्बन्धको कुनै ‘रकेट साइन्स’ त हुन्न, तर पनि सुखी वैवाहिक सम्बन्धको लागि तपाईं के टिप्स दिन चाहानुहुन्छ ?
मेरो श्रीमान् आनन्द शान्त स्वभावको हुनुहुन्छ । उहाँ मेरो समयलाई लिएर खासै ‘पोसेसिभ’ हुनुहुन्न र मलाई ‘स्पेस’ पनि दिनुहुन्छ । उहाँ मेरो कामलाई पनि आफ्नो काम जत्तिकै महत्व दिनुहुन्छ । मैले धेरै विवाहित पुरुषहरु देखेको छु की उनीहरु आफ्नो श्रीमतीलाई माया त गर्छन्, तर उनीहरुको कामलाई महत्व दिँदैनन् र सम्मान गर्न जान्दैनन् वा सक्दैनन् ।

तर मेरो हकमा यस्तो भएको छैन । मलाई र मेरो कामलाई मेरो श्रीमान्ले धेरै सम्मान गर्नुभएको छ । तर जसरी आनन्दको प्राथमिकताहरु परिवर्तन हुन्छ, ठिक उसैगरी मेरो पनि परिवर्तन हुन्छ । अहिले मेरो प्राथमिकता आनन्द र मेरो परिवार हो । यसैगरी आनन्दको प्राथमिकता पनि म हुँ । 

हाम्रो सम्बन्धमा धेरै समानता छ, तर तपाईंको जिन्दगी विवाहपश्चात् परिवर्तन हुन्छ नै । तपाईंले नयाँ परिवार पाउनु हुन्छ । नयाँ व्यतिmहरुसँग भेट्नु हुन्छ । तपाईं नयाँ खुशी र जिम्मेवारीसँगै परिवर्तन हुनुहुनेछ । त्यो परिवर्तनलाई सहजरुपमा लिएर सही निर्णय गर्नसक्नुपर्छ ।

तपाईं र आनन्दबीच कुन कुरालाई लिएर असहमति हुन्छ ?
वास्तवमा मेरो श्रीमान बिहान ४ बजे र कहिले त साढे ३ बजे नैै उठ्नुहुन्छ । उहाँको काम एकाबिहानैदेखि नै सुरु भइसक्छ । यद्यपि म पनि ढिला उठ्नेमा पर्दिन, तर साढे ३ अथवा ४ बजेदेखि भने उठ्न सक्दिन् । 
म जब बिहान उठ्छु मेरो श्रीमान् मसँगै हुँदैनन् । यहि एउटा कुरा छ जुनमा हाम्रो सहमति हुनसकेको छैन । 

उहाँ राति बाहिर जान मन पराउनु हुन्न । मलाई पनि मन पर्दैन, तर उहाँ त पटक्कै जानुहुन्न, किनभने उहाँलाई बिहानै उठ्नुपर्ने हुन्छ । १० बजेसम्म त उहाँ निन्द्राको संसारमा हराइसक्नु हुन्छ । त्यसैले हामी राति पार्टीहरुमा जाँदैनौँ ।

तपाईं नीरजा, वीरे दी वैडिङजस्ता चलचित्रमा काम गरिसक्नु भयो । अब ‘जोया फ्याक्टर’ जस्तो नारी प्रधान चलचित्रमा देखिँदै हुनुहुन्छ । अभिनेत्रीको लागि चलचित्रको अहिलेको समयलाई कसरी मूल्यांकन गर्नुहुन्छ ? 
अभिनेत्रीहरुका लागि केही परिवर्तन त भएका छन्, तर जति मानिसहरु सोचिरहेका छन् त्यति भने हुन सकेको छैन । बलिउडमा अभिनेत्रीहरुको सघंर्ष अझै पनि जारी छ । आज पनि हामी अभिनेत्रीहरुलाई हेर्ने दृष्टिकोणमा परिवर्तन ल्याउन सकेका छैनौँ । जति सम्मान र जिम्मेवारी दिनुपर्ने हो, त्यति दिन सकिरहेका छैनौं । मलाई लाग्छ हामीले जति पाउनुपर्ने हो त्यति पाउन सकेका छैनौं ।

अभिनेत्रीहरुको लागि ‘क्वालिटि’वाला भूमिका कमै लेखिएको हुन्छ । बलिउड पुरुष प्रधान इन्डष्ट्रि हो, र यसैलाई ध्यानमा राखेर भूमिका लेखिएको हुन्छ । कथा पनि पुरुषद्वारा पुरुषकै लागि लेखिएको हुन्छ । 
महिला निर्देशकहरु पनि केवल महिलालाई प्राथमिकतामा राखेर चलचित्र बनाउँदैनन् । उहाँहरुको चलचित्र पनि त पुरुष प्रधान नै हुन्छन् नि । फराह खान होस् की जोया अख्तर होस् हिरोहरु प्राथमिकतामा राखेर बनाउनु हुन्छ । मलाई लाग्छ कि अभिनेत्रीहरु अझै अगाडि आउन जरुरी छ ।

सोनाक्षीले हालसालै अन्तवार्तामा भनेकी छिन् कि जब अभिनेत्रीहरु ‘लिड रोल’ गर्छन्, तब ठूला स्टार्स उनीहरुसँग काम गर्न चाहँदैनन् । यस विषयमा तपाई के भन्नु हुन्छ ?
उहाँले एकदम ठिक भन्नु भयो । उहाँले गलत बोलिराख्नु भएको छैन । म आफैंसँग पनि धेरै पटक यस्तै घटना भएका छन् । मेरो धेरैजसो अभिनेत्री प्रधान चलचित्रको लागि अभिनेता खोज्नै गाह्रो भएको छ । 

तपाईंलाई थाहा छ ? जोया फ्याक्टरमा दुई–तीन अभिनेतालाई अफर गरिएको थियो । तर यो अभिनेत्री प्रधान चलचित्रमा उहाँहरुले काम गर्न अस्वीकार गरिदिनु भयो । तब तपाई के गर्न सक्नु हुन्छ ?
मैले थुप्रै पुरुष प्रधान चलचित्रमा सानै भूमिका भए पनि गरेकी छु । तर मेरो महिला प्रधान चलचित्रमा कुनै पनि ‘ठूलो’ अभिनेता काम गर्न मान्नुहुन्न ।

तपाईंको ‘जोया फ्याक्टर’ रिलिज हुँदैछ । तपाईलाई आफनो ‘लक फ्याक्टर’ बलियो छ भनेर कहिले महसुस भयो ?
मलाई लाग्छ अनिल कपूरकी छोरी हुनु नै सबैभन्दा ठूलो ‘लक फ्याक्टर’ हो । हो, मैले चलचित्रमा आएपछि धेरै मेहनत गरेँ र धेरैपटक मेरो हातबाट राम्रोे मौका पनि गुम्यो, किनभने मेरो भाग्यले मलाई त्यो समयमा साथ दिएन । 
म त यो भन्छु कि, भाग्यले साथ दियो भने मेहनतको राम्रो फल मिल्छ, जब भाग्यले साथ दिँदैन सबै मेहनत बेकार जान्छ । तपाई आफनो भाग्यको भरोसामा हात बाँधेर यत्तिकै भने बस्न सक्नुहुन्न ।

बलिउड इन्डष्ट्रीमा हामीले देखेका छौं, भाग्यले साथ नदिँदा मानिसहरु संख्या विज्ञान वा ज्योतिष शास्त्रको सहारा लिन्छन् । तपाईं यी कुराहरुमा विश्वास गर्नुहुन्छ ?
म भारतीय हुँ र ज्योतिषीमा विश्वास गर्नु हाम्रो स्वभाव हो । म ज्योतिषमा गहिरो विश्वास राख्छु । म संख्या विज्ञानमा पनि विश्वास राख्छु । यो एक किसिमको विद्या हो र यदि तपाईं कुनै कुशल हस्त विशेषज्ञ या ज्योतिषशास्त्रीसँग सल्लाह लिनुभयो भने तपाइँलाई धेरै सहयोग मिल्छ । 
यो पनि एक प्रकारको विज्ञान हो । मेरो नाम सोनम पनि ‘न्यूमरोलोजी’को हिसाबबाटै राखिएको हो । मेरी आमा पनि यस्ता विषयमा निकै विश्वास गर्नुहुन्छ ।