बेलायतको विपक्षी दल लेबर पार्टीका नेता जेरेमी कोर्बिनले ब्रेक्जिट सम्झौताका विषयमा पार्टीले निर्णय गर्ने बताएका छन् । उनले आइतबार दोस्रो चरणको जनमत संग्रहमा ब्रेक्जिटका विषयमा कसरी अगाडि भन्ने निर्णय गर्ने र त्यहीअनुसार अघि बढ्ने बताएका छन् ।
पार्टीको वार्षिक सम्मेलनमा उनले मतदातालाई युरोपियन युनियनमा बसिरहने अथवा 'विश्वासिलो' सम्झौता गर्ने भन्ने विकल्प समेत प्रस्ताव गरेका छन् । युरोपियन युनियनमा रहिनुपर्ने पार्टी सदस्यहरूको दबाब उनलाई छ । उनले भने, "अहिले पार्टीको नेतृत्व मैले गरिरहेको छु । पार्टीको नेतृत्व गर्न पाउँदा गर्व महसुस गरेको छु । प्रजातन्त्रको वकालत गरिरहेको पार्टीको निर्णय मान्न म तयार छु ।"
प्रधानमन्त्री जोन्सनले निर्धारित मिति अक्टोबर ३१ मा जसरी पनि बाहिरिने बताउँदै आएका छन् । तर, केही सत्तारुढ दलका सांसद तथा विपक्षी दलले भने अहिलेकै अवस्थामा कुनै नयाँ विकल्प नदिएर ईयूबाट बाहिरिँदा अस्थिरता बढ्ने, मुलुकको ठूलो व्यापार व्यवसाय धरापमा पर्ने र ४० वर्ष लामो परराष्ट्र नीतिको अन्त्य हुने तर्क गरेका छन् ।
तर, ईयूका कट्टर आलोचकसमेत रहेका पार्टीका केही नेताहरु यस विषयमा तटस्थ देखिन्छन् । उनीहरुले पार्टीभित्रका ईयूमा रहिरहनुपर्छ भन्ने सदस्य र अलग हुनुपर्छ भन्ने सदस्यबीच छलफल गरेर साझा धारणा बनाएर अघि बढ्नुपर्ने बताएका छन् ।
केही साताअघि प्रधानमन्त्री बोरिस जोन्सनले भने ईयूबाट जसरी पनि बाहिरिने प्रतिबद्धता दोहोर्याएका छन् । उनले 'गर या मर' को स्थिति रहेको बताएका छन् । सत्तारुढ दल कन्जरभेटिभ पार्टी भने ब्रेक्जिटका विषयमा विभाजित छ ।
रोयटर्स