मुम्बई । अभिनेता अमिताभ बच्चनले होस्ट गर्दै आइरहेको केबीसीको ११ सिजनको शुक्रबारको इपिसोडमा अभिनेत्री सोनाक्षी सिन्हा पनि उपस्थित थिइन् ।

तर केबीसीमा रामायणसँग सम्बन्धित एक प्रश्नको जवाफ दिन नसकेर लाइफ लाइनको सहयोग मागेपछि सोनाक्षी सामाजिक सञ्‍जालमा ट्रोलको सिकार बनिन् । 

अत्यधिक ट्रोल हुन थालेपछि सोनाक्षीले शनिबार ट्विटरमा आक्रोश पोख्दै लेखेकि छिन्, “मलाई पायथागोरस थ्योरम, भेनिसको व्यापारी, आवधिक तालिका अरु के-के कुरा पनि याद छैन् । यदि तपाईसँग अरु कुनै काम छैन् र यति धेरै फुर्सद छ भने कृपया यी कुराहरुको पनि 'मिम' बनाउनुहोला । मलाई 'मिम' मपनपर्छ ।”

उनलाई 'रामायणमा हनुमानले सञ्‍जीवनी बुटी कसका लागि ल्याएका थिए' भन्ने प्रश्न गरिएको थियो । जसमा उनले लाइफ लाइनको मद्दत लिइन् र १.६ लाख भारतीय रुपैयाँ जित्न सफल भइन् ।