एजेन्सी । एकदिवसीय विश्वकपको सेमिफाइनलमा न्युजिल्यान्डविरुद्ध पराजित भएपछि भारतीय क्रिकेटर महेन्द्रसिह धोनी मैदान देखिएका छैनन् । सामाजिक सञ्जालमा भारतीय समर्थकहरुले धोनीले जानीजानी भारतीय टिमलाई हराएको भन्दै आलोचना गरेका थिए । त्यसो त भारतमा आलोचना सामान्य जस्तै मानिन्छ ।
विगत ३ महिनायता धोनी मैदानमा नदेखिएपछि धेरैले संन्यास लिँदैछन् भन्ने शंका गरिरहेका छन् । पूर्व क्रिकेटरले समेत धोनीको भविष्यको बारेमा अनेकन टिप्पणी गरिरहेका छन् । यहीबीचमा पूर्वक्रिकेटर युवराज सिंहले धोनीले भारतीय क्रिकेटको लागि धेरै गरिसकेको र आफ्नो करियरको बारेमा निर्णय गर्न दिनुपर्ने बताएका छन् ।
“धोनीले भारतीय क्रिकेटको लागि धेरै गरिसकेका छन् । उनी क्रिकेटमा सफल भारतीय कप्तानको रुपमा गनिन्छन् । त्यसैले उनलाई निर्णय गर्नको लागि समय दिनुपर्छ । उनलाई संन्यास लिने कि नलिने बारेमा निर्णय गर्न आवश्यक छ । यदि उनी अझै खेल्न चाहन्छन् भने हामी उनलाई सम्मान गर्छौं,” युवराजले स्पोर्टस् मुभमेन्टको सम्मेलनमा भने ।
युभराज सिंहभन्दा पहिले भारतका क्रिकेट लिजेन्ड सुनिल गाभास्करले इन्डिया टुडेसँग बोल्दै धोनीले संन्यास लिने कि नलिने बारेमा निर्णय गर्ने समय आएको बताएका थिए । युवराजले रिसब पन्तबारे पनि धारणा राखेका थिए ।
रिशव पन्तसँग धोनीको तुलना गर्न शोभा नदिने बताएका युवराजले भने, “महेन्द्र सिंह धोनी एकदिनमा बनेका होइनन् । उनलाई आजको अवस्थामा आइपुग्न वर्ष लागेको थियो । अब यसैगरी उनको ठाउँमा अरु बन्नलाई पनि त्यति नै समय लाग्नेछ ।” टी ट्वान्टी विश्वकप सुरु हुन एक वर्ष बाँकी छ । युवराजले पन्तको मनोभावना बुझेर सीपमा विकास गर्नुपर्ने बताए ।