काठमाडौं । संयुक्त राज्य अमेरिकाले आणविक वार्ता असफल भएको उत्तर कोरियाको दाबी अस्वीकार गरेको छ । अमेरिकाले राम्रो छलफल भएको बताएको छ ।
यसअघि उत्तर कोरियाले अमेरिकाले वार्ताका टेबलमा सहमतिका लागि केही नल्याएको आरोप लगाउँदै वार्ता भंग भएको बताएको थियो । वार्ताका लागि दुबै देशका अधिकारीहरु शनिबार स्वीडेनको स्टकहोम पुगेका थिए।
उत्तर कोरियाले मिसाइल परीक्षण गरेको अर्को दिन नै उनीहरु छलफलका स्वीडेन पुगेका थिए । यसअघि जुनमा अमेरिकी राष्ट्रपति डोनाल्ड ट्रम्प र उत्तर कोरियाली नेता उनबीच कोरियाली गैरसैन्य इलाकामा भएको भेटका क्रममा ओपचारिक वार्ताका लागि पहल गर्ने विषयमा छलफल भएको थियो ।
उत्तर कोरियाको राजदूतावास भएको क्षेत्र स्टकहोमको लिन्डिगोमा उत्तर कोरियाका किम म्योङ गिल र उत्तर कोरियाका लागि अमेरिकी राष्ट्रपति डोनाल्ड ट्रम्पका विशेष दूत स्टिफेन बाइगनले वार्ता टोलीको नेतृत्व गरेका थिए ।
छलफलपछि शनिबार सञ्चारकर्मीसँग कुरा गर्दै उत्तर कोरयाली किम म्योङले भने, "अमेरिकासँगको छलफलले हाम्रो अपेक्षा पूरा गर्न सकेन र अन्तत: वार्ता भंग भयो ।"
उनले अमेरिकाले गरेको अफर अनसार लचक हुन नसकेको र नयाँ तरिका र सिर्जनात्मक समाधानको कुनै विकल्प नदिएर आफूलाई निकै निराश पारेको बताए ।
उत्तर कोरियाको प्रतिक्रियापछि अमेरिकी विदेश मन्त्रालयकी प्रवक्ताले एक विज्ञप्ति जारी गर्दै अमेरिकाले सिर्जनात्मक समाधान प्रस्तुत गरेको र उत्तर कोरियाले भनेको जस्तो वार्ता असफल नभएको दाबी गरेकी थिइन् । विज्ञप्तिमा भनिएको छ, "समकक्षी उत्तर कोरियासँग साढे आठ घण्टाको छलफल राम्रो भएको र अमेरिकाले सिर्जनात्मक समाधान अफर गरेको थियो ।"
उत्तर कोरियाली आणविक निःशस्त्रीकरणका विषयमा सन् २०१८ र यसैवर्षको जनवरीमा पनि स्वीडेनमा भएका थिए । भियतनामको हनोईमा सम्पन्न दोस्रो उच्चस्तरीय वार्ता भंग भएपछि दुबै देशबीच औपचारिक वार्ताहरु हुन सकेका थिएनन् ।
उत्तर कोरियाले वार्ताका लागि दबाब सिर्जना गर्न क्षेप्यास्त्र परीक्षण र नयाँ हातहतियारको प्रदर्शनीलाई निरन्तरता दिइरहेको छ । विज्ञहरुले उत्तर कोरियाली यस रणनीतिले केही फाइदा पुगेको बताएका छन् ।
उत्तर कोरियाले गत बुधबार पनि निकै ठूलो रकेट परीक्षण गरेको थियो । तर उत्तर कोरियाले जल पनडुब्बीबाट नयाँ हातहतियारको सफल परीक्षण गरी आफूहरु हतियारको विकासका सन्दर्भमा नयाँ युगमा प्रवेश गरेको जनाएको छ । तर अमेरिकी रक्षा मन्त्रालयले उत्तर कोरियाले पनडुब्बीबाट नभई समुद्री सतहबाट क्षेप्यास्त्र परीक्षण गरेको दाबी गरेको छ ।
अमेरिकी राष्ट्रपति ट्रम्पले पनि उत्तर कोरियाले गरिरहेका सानातिना हतियार परीक्षणबाट अमेरिकालाई खासै प्रभाव नपर्ने बताउँदै वार्ताका लागि तयारी भएको बताएका थिए । -बीबीसी