एजेन्सी । बिजुलीको गति, अद्भूत ड्रिबलिङ क्षमता, सीप, डिफेन्डिङ स्टाइल र सन्तुलनले जर्ज बेस्टलाई अरुभन्दा पृथक बनाएको छ । उनी दुबै खुट्टाले फुटबल खेल्न सक्थे । बेस्ट प्रकृतिले दिएको विश्वका उत्कृष्ट फुटबल खेलाडी हुन् । उनी म्यानचेस्टर युनाइटेडका आजसम्मकै उत्कृष्ट फुटबल खेलाडी हुन् । उनीपछि डेनिस ल र सर बोबीचार्लटन पर्दछन् । यी तीन खेलाडीको मूर्ति बनाइएको छ । जसलाई युनाइटेड ट्रिनिटी भन्ने गरिन्छ । सन् १९६८ मा बेस्ट बालोन डी’ओर अवार्डले सम्मानित भएका थिए ।
यसैगरी उनलाई सन् १९९९ मा आईएफएफएचएसले २० औं शताब्दिका उत्कृष्ट खेलाडीहरुको सूचीको १६ औँ स्थानमा राखेको थियो । विश्व फुटबलका पिता पेलेले बेस्टलाई विश्वकै उत्कृष्ट फुटबल खेलाडी भनेर सम्मान गरेका थिए । आइरिस फुटबल एसोसियनले जर्ज बेस्टजस्तो खेलाडी आजसम्म आयरल्यान्डमा खेलेको छैन भन्दै वर्णन गरेको थियो ।
बेस्ट सन् १९४६ मे २२ मा आयरल्यान्डको बेलफास्टमा जन्मिएका थिए । बेस्ट सानैबाट फुटबलप्रति आकर्षित भएका थिए । फुटबल राम्रो खेलेको देखेर उनका साथीहरुले उनलाई फुटबलमा नै ध्यान दिन सल्लाह दिन्थे ।
म्यानचेस्टर युनाइटेडका स्काउट बोब बिशोपले बेस्टको प्रदर्शन देखेर प्रशिक्षक म्याट बुस्बीलाई टेलिग्राम पठाएका थिए । उक्त टेलिग्राममा लेखिएको थियो,“मलाइ लाग्छ मैले तिम्रोलागि प्रतिभा भेटाएको छु ।” बेस्टको स्थानीय क्लबले धेरै सानो र दुब्लो भयो भनेर क्लबमा अनुबन्ध गरेको थिएन । तर ग्लेनटोरन क्लबले उनको प्रतिभा नचिने पनि युनाइटेडले भने चिन्यो । १५ वर्षको उमेरमा नै उनी युनाइटेडमा अनुबन्ध भए ।
बेस्टले १७ वर्षको उमेरमा वेस्ट ब्रोमविच अल्बिओनविरुद्ध खेलेर क्लब करियरको सुरुवात गरेका थिए । त्यो दिन थियो १९६३ को सेप्टेम्बर १४ । पहिलो खेलपछि उनलाई रिजर्भमा राखियो । पहिलो खेलमा गोल नगरे पनि दोस्रो खेलमा भने उनले करियरको पहिलो गोल गरे । जुन खेल बन्लेविरुद्ध थियो । उक्त खेलमाबन्ले ५-० ले पराजित भएको थियो । त्यसपछि प्रशिक्षक म्याट बुस्बीले उनलाई टिममा राखे । १९६३-१९६४ को सिजनमा उनले युनाइटेडको लागि २६ खेल खेले जसमा ६ गोल गर्न सफल भए । डिभिजन लिग, एफए कपमा हार व्योहोरे पनि युनाइटेडले एफए युथ कप भने जित्न सफल भयो ।
१९६५ माभने बेस्टले युनाइटेडलाई फर्स्ट डिभिजन टाइटल दिलाए । त्यसपछि भने उनको क्लबमा छुट्टै स्थान बन्यो । त्यो समयमा विपक्षीका डिफेन्डरहरु बेस्टको सीपलाई हराउन रफ खेल खेल्थे । तर म्याट बुस्बीले भने बेस्टलाई चुनौतीको सामना गर्नको लागि पहिले नै तयार पारिसकेका हुन्थे ।
सन् १९६६ मार्च ९ माउनले यूरोपीयन कपको क्वार्टरफाइनलमा बेन्फिकाविरुद्ध २ गोल गरेका थिए । त्यो समयमा उनी जम्मा १९ वर्षका थिए । पोर्चुगलको मिडियाले उनलाई इल बिटल्सको उपमा दिएको थियो । सन् १९६७ मा बेस्ट, ल र चार्लटन मिलेर युनाइटेडलाई अर्को फर्स्ट डिभिजन टाइटल जिताए ।
सन् १९६८ मा युनाइटेडले फाइनलमा बेन्फिकालाई पराजित गर्दै युरोपियन कप हात पार्यो । युनाइटेड युरोपीयन कप जित्ने पहिलो इंलिस् क्लब हो । सन् १९६८ मा उनी बालोन डी’ओर अवार्डबाट सम्मानित भए । त्यतिबेला उनी जम्मा २२ वर्षका थिए ।
युनाइटेडका ट्रिनिटीले १९६८-१९६९ को सिजनमा पनि राम्रो प्रदर्शन गर्ने देखिएको थियो तर प्रशिक्षक म्याट बुस्बीले प्रशिक्षकबाट सन्यास लिए । बुस्बी त्यो समयका उत्कृष्ट प्रशिक्षक मानिन्थे ।
बेस्ट २७ वर्ष पुगिसकेपछि भने युनाइटेडबाट खेल्न छाडे । बेस्टले युनाइटेडको लागि ४७० खेलमा १७९ गोल गरेका थिए । बेस्टले युनाइटेड छाडेपछिउनको फुटबल प्रतिको लगाव हराएको थियो । कसैकसैले त उनले फुटबल प्रतिको मोह हराएर युनाइटेड छाडेको भन्ने गरेका छन् ।
युनाइटेड छाडे पछि उनी स्कटल्यान्ड, अस्ट्रेलिया, अमेरिका, आयरल्यान्ड र साउथ अफ्रिकाका क्लबमा खेल्न थाले । कुनै पनि क्लबमा उनी २ सिजनभन्दा बढी टिक्न सक्दैनथे । सन् १९८३ माउनले व्यावसायिक फुटबलबाट सन्यास लिए । युनाइटेडबाट करियरको सुरुवात गरेका उनी २० वर्षसम्म फुटबल खेले ।
राष्ट्रिय टिममा भने उनले जादु देखाउन सकेनन् । राष्ट्रिय टिमको लागि जम्मा ३७ खेल खेलेका बेस्टले जम्मा ९ गोल गरेका थिए ।
युवा अवस्थामा युनाइटेडमा आउँदा उनी निकै लजालु स्वभावका थिए । लामो कपाल, पपस्टारको जस्तो गेटअप गर्ने बेस्ट फुटबलका पहिलो सेलिब्रेटी थिए । समय बित्दै गयो । जीवनमा अनेक उतारचढाव आए । पछि उनले अनावश्यक रुपमा धेरै पैसा खर्च गर्न थाले, अल्कोहलमा डुबे, फुटबल करियर सकाए र आफ्नो जीवनमा अनेक समस्या निम्ताए । जसले गर्दा बाँकी रहेको जीवनमा उनले दु:ख पाए । सन् २००५ माउनी यो संसार छाडेर गए । त्यतिबेला उनी जम्मा ५९ वर्षका थिए ।