चीनका राष्ट्रपतिको स्वागतमा रातारात तयारी, राष्ट्रपति भण्डारीले नै गर्नेछिन् विमानस्थलमा स्वागत

यसअघि जियाङ जेमिन आउँदा पनि तत्कालीन राजा र प्रधानमन्त्रीले विमानस्थलमा नै गएर स्वागत गरेका थिए

चीनका राष्ट्रपतिको स्वागतमा रातारात तयारी, राष्ट्रपति भण्डारीले नै गर्नेछिन् विमानस्थलमा स्वागत

काठमाडौं । चीनका राष्ट्रपति सी जिनपिङको शनिबारदेखि हुने नेपालको दुई दिने राजकीय भ्रमणका लागि राजधानीमा रातारात तयारी भइरहेको छ । ठाउँठाउँमा स्वागतद्वार र बिजुलीका पोलमा चीनका राष्ट्रपति सी र राष्ट्रपति विद्यादेवी भण्डारीका तस्बिरहरु राखिएका छन् । 

हिजो भ्रमणको औपचारिक घोषणा भएपछि उनको स्वागतको तयारीले गति पाएको हो । चीनका राष्ट्रपति सीको नेपाल भ्रमणका बारेमा आज बिहान ९ बजे बालुवाटारमा प्रधानमन्त्री केपी शर्मा ओलीले पूर्व प्रधानमन्त्रीहरु तथा पूर्व परराष्ट्रमन्त्रीहरुसँग परामर्श गर्दैछन् । 

राष्ट्रपति सी शनिबार काठमाडौं ओर्लिंदा उनलाई राष्ट्रपति विद्यादेवी भण्डारीले नै विमानस्थलमा स्वागत गर्नेछिन् । साथै प्रधानमन्त्री केपी ओली पनि स्वागतमा जानेछन् । 

नेपालले पछिल्लो समयमा राष्ट्रप्रमुख वा सरकार प्रमुख आउँदा कसैलाई सवारी मन्त्री तोकेर उनैले विमानस्थलमा स्वागत गर्ने गर्दै आएको थियो । तर, यसपाली सीलाई विशेष महत्व दिन लागिएको हो । 

प्रधानमन्त्रीका प्रेस सल्लाहकार डा. कुन्दन अर्यालले राष्ट्रपति भण्डारीले नै चीनका राष्ट्रपतिलाई विमानस्थलमा स्वागत गर्ने बाह्रखरीसँगको कुराकानीमा जानकारी दिए ।

चीनका राष्ट्रपतिको तहबाट यसपालि २३ वर्षपछि भ्रमण हुन लागेको हो । यसअघि सन् १९९६मा नेपाल आएका चीनका राष्ट्रपति जियाङ जेमिनलाई पनि तत्कालीन राजा वीरेन्द्र र प्रधानमन्त्री शेरबहादुर देउवाले विमानस्थलमा नै गएर स्वागत गरेका थिए । 

यद्यपि पहिला र अहिलेको चीनमा आकाश जमिनको फरक भइरहेको छ । त्यति नबोल्ने आफ्नै काम मात्रै गरिरहने भनेर बुझिने चीन अहिले आक्रामक विदेश नीति लिएर अघि बढिरहेको छ

चीनका अहिलेका राष्ट्रपति सीलाई तत्कालीन नेता माओत्से तुङपछि सबै भन्दा शक्तिशाली मानिने गरिएको छ । सी विचारधारालाई अहिले चीनले आफ्नो मुलुकको मार्गनिर्देशक सिद्धान्त बनाइरहेको छ ।

चीनका राष्ट्रपति आउँदा नेपाल रेल सम्बन्धी महत्वपूर्ण समझदारीमा हस्ताक्षर हुन सक्ने जनाइएको छ । यसैगरी चीनले प्रस्ताव गरेको सुपुर्दगी सम्बन्धी सन्धीमा पनि हस्ताक्षर हुने सम्भावना रहेको जनाइएको छ । यद्यपि सरकारको तर्फबाट औपचारिक रुपमा जानकारी गराइएको छैन ।

सुपुर्दगी सन्धीका बारेमा मन्त्रिपरिषद्को बैठकले पास गरेको बारेमा आफूले पनि सुनेको प्रधानमन्त्रीका प्रेस सल्लाहकार डा. अर्यालले जानकारी गराए । 

तर, त्यसमा के कस्ता बुँदाहरु पारिएका छन् भन्ने विषय भने खुलिसकेको छैन । चीनले आफ्नै विशेष प्रशासित क्षेत्र हङकङमा सुपुर्दगी सम्बन्धी विधेयककै कारण लामो समयदेखि आन्दोलन झेल्नुपरेकाले त्यसमा राखिने विषयवस्तुका बारेमा सतर्क रहनुपर्ने कूटनीतिक क्षेत्रले जोड दिँदै आएको छ । 

सीको सुरक्षाका लागि चार घेराको सुरक्षा प्रबन्ध गरिएको छ । जसमा सबैभन्दा अगाडि सेना र त्यसपछि क्रमैसँग सशस्त्र प्रहरी, नेपाल प्रहरी र गुप्तचरको टोली रहने बुझिएको छ ।

प्रतिकृया दिनुहोस
ad