राष्ट्रपति सीको नेपाल भ्रमणबारे भारतीय मिडियामा पनि चासो

भारतीय पत्रिकामा रक्षामन्त्री पोखरेलको भनाइ– सपिङ लिस्ट छैन, भ्रमण बेइजिङ-काठमाडौं सम्बन्ध मजबुत गर्ने अवसर

राष्ट्रपति सीको नेपाल भ्रमणबारे भारतीय मिडियामा पनि चासो

काठमाडौं । चीनका राष्ट्रपति सी जिनपिङले भारत हुँदै नेपालको भ्रमण गर्न लागेको विषय भारतका मिडियामा पनि चर्चाको विषय बनेको छ । भारतीय मिडियामा चीनसँगको नेपालको रेल सम्बन्धका बारेमा चासो व्यक्त गरेको पाइएको छ  ।

राष्ट्रपति सी भोलिदेखि भारतको दुई दिने भ्रमणमा गएर त्यसपछि शनिबार नेपाल आउने हुन् । उनको नेपाल भ्रमणको क्रममा चीनसँग नेपालको रेलबारेमा कुराकानी हुन सक्ने कि नसक्ने भनेर भारतीय पत्रिका द हिन्दूको अनलाइन संस्करणमा लामो समाचार बनाइएको छ । 

सो समाचारमा नेपालका उपप्रधान तथा रक्षामन्त्री ईश्वर पोखरेलसँग पनि फोनमा कुरा गरिएको भन्दै उद्धृत गरिएको छ । रक्षामन्त्री पोखरेललाई उद्धृत गर्दै समाचारमा राष्ट्रपति सीको नेपाल भ्रमणमा रेल कनेक्टिभिटीको विषयले प्राथमिकता पाउने अपेक्षा गरिएको जनाइएको छ । 

चीनका वरिष्ठ अधिकारीहरुले भने राष्ट्रपति सीको नेपाल भ्रमण चीन र भारतको सम्बन्धमा ‘प्लस’ हुने जनाएको समेत समाचारमा उल्ल्ोख गरिएको छ ।

चीनका उपमन्त्री लुओ झाओ हुइले हिन्दूसँगको कुराकानीमा भनेका छन्, ‘‘हामीलाई आशा छ, चीन–भारत प्लस सहयोग नेपालसम्म विस्तार हुनेछ । त्यो सहयोग भुटानसम्म विस्तार हुनेछ ।’’ लुओ केही अघिसम्म भारतका लागि चीनका राजदूत थिए । 

सो पत्रिकासँगको कुराकानीमा रक्षा मन्त्री पोखरेलले भने आफूहरुको कुनै ‘सपिङ लिस्ट’ नभएको जनाएका छन् । उनले यो भ्रमणलाई काठमाडौं र बेइजिङ सम्बन्धलाई मजबुत पार्ने अवसरका रुपमा लिएको जनाएका छन् । यो भ्रमणलाई काठमाडौं र बेइजिङबीच मित्रताको पुल बनाउने अवसरका रुपमा उपयोग गर्ने उनको भनाइ हिन्दूले उद्धृत गरेको छ ।  

सो समाचारमा रेलका अतिरिक्त जलविद्युत् परियोजना, आन्तरिक पूर्वाधार र फाइभजी नेटवर्कको बारेमा कुरा हुने समेत समाचारमा जनाइएको छ । 

भारतका प्रधानमन्त्री मोदी र चीनका राष्ट्रपति सी जिनपिङबीच विगतमा भएका भेटवार्ताका क्रममा त्यस खालको सहयोग अफ्रिका र एशियाली देशमा पनि गर्ने भनिएको जनाइएको थियो । दुई देशबीच दक्षिण अफ्रिकामा भएको शिखर सम्मेलनमा ‘चाइना–इण्डिया प्लस वान’ वा ‘चाइना–इण्डिया प्ल एक्स’ सहयोगको मोडल पनि  बेइजिङले प्रस्ताव गरेको थियो । 
 

प्रतिकृया दिनुहोस
ad