बराहक्षेत्र (सुनसरी) । सप्तकोशी नदीमा सञ्चालनमा आएका पानीजहाज (जेटबोट) ले तराईबाट पहाड उक्लने र माथिबाट तराई झर्ने यात्रुलाई निकै सहज भएको छ । नेपाली झन्डासहितका साना पानीजहाजमा चढ्न र जलयात्रा गर्नेहरुको यतिबेला कोशी किनारमा घुइँचो नै लाग्ने गरेको छ । 

सुनसरीको चतराघाट पुगेर जेटबोट चढेर मास्तिर भोजपुरतर्फ जाने, उताबाट तल तराई झर्ने र बराहक्षेत्रसम्म पुगेर दर्शन गर्न जानेहरुको उत्तिकै भीडभाड हुने गर्छ । सप्तकोशीको चतराघाटमा निर्माण भएको पुलबाट चार मिनेटको यात्रा गर्दा बराहक्षेत्र पुगिन्छ भने भोजपुरको सिम्ले पुग्न १६ मिनेट लाग्छ । 

घुमफिरमा जाने र बराहक्षेत्र दर्शनार्थीका लागि पनि यो सुविधाले निकै राहत मिलेको छ । बराहक्षेत्र दर्शन गर्न पुगेका बिर्तामोडका प्रज्वल भट्टराईले पहिलो पटक जेटबोट चढेर धार्मिक क्षेत्रसम्म पुगेको बताए । उनले भने ‘‘पानीमाथि जहाजमा चढेर बराहक्षेत्रसम्म पुग्दा निकै रमाइलो र रोमाञ्चक महशुस भएको छ ।’’

बराहक्षेत्र मेरिन रिसोर्ट प्रालिले सानो र ठूला ५० भन्दा धेरै यात्रु अटाउने जहाज सञ्चालनमा ल्याएको छ । दश–दश जना अट्ने साना बोट पनि ल्याएको छ । बराहक्षेत्र नगरपालिकाका मेयर निलम खनालले जहाज सञ्चालनको शुभारम्भ गरेका थिए । 

प्रालिले चार वटा जहाज चलाउन मिल्ने गरी सुनसरीको बराहक्षेत्र नगरपालिका १, चतराघाटमा आफ्नै पोर्ट र काउन्टर बनाएको छ । चारवटा जहाज ल्याउन र कोशी टापुमा रिसोर्ट बनाउन गरी जम्मा करिब ८ करोड १२ लाखको लगानी गरेको बताइएको छ । यसअघि ‘बराहक्षेत्र जल यातायात्र तथा पर्यटन सेवा प्रालि’ले २०७४ चैत १९ देखि कियान नामको एउटा जहाज सञ्चालन गरेको थियो । 

जेटबोट चलेपछि धनकुटा, भोजपुर र खोटाङका गाउँहरुमा जाने यात्रुले सेवा पाएका छन् । सप्तकोशीमा नेपाल रिभर ट्रान्सपोर्ट प्रालि र बरुण वाटरवेज प्रालिले २०५५ सालदेखि नै जेटबोट सञ्चालन थालेको थियो । 

सप्तकोसी टुरिजम एन्ड वाटर ट्रान्सपोर्टेसन प्रालिले सप्तकोसीमा चलाउनकै लागि नेपालमै जहाजको फिटिङ गरी सञ्चालनमा ल्याएको छ । करिब डेढ करोड खर्च गरेर जहाज निर्माण भएको सञ्चालक राजेन्द्र कार्कीले जानकारी दिएका छन् । कार्कीले भने, ‘‘अहिले भने मर्मत गर्नुपरेकोले केही दिनदेखि बन्द छ । इन्जिनियर आएर मर्मत भई एकदुई दिनमै सञ्चालन गर्दैछौं ।’’ कार्कीले जेटबोट सञ्चालनमा आएपछि पहाडबाट तल झर्नेहरुको यात्रा निकै सहज र दूरी छोटिएको बताए । हालसम्म सुनसरीको चतराघाटबाट मात्र जहाज चलिरहेको छ । 

चतराघाटबाट चल्ने जहाज धनकुटाको त्रिवेणी, अरुण नदीको किनार सिम्ले, सुनकोसी नदीतर्फ चुवार, मचुवालगायतका ठाउँसम्म पुग्छन् ।