काठमाडौं । पाकिस्तानका प्रधानमन्त्री इमरान खानले भारतीय प्रधानमन्त्री नरेन्द्र मोदी निकै त्रसित भएको बताएका छन् ।
शुक्रबार काश्मीरका विषयमा फेरि ध्यानाकर्षण गराउँदै पोस्ट गरिएको ट्विटमा भनेका छन्, "मोदी बाघमा सवार छन् । उनले ९० लाख सेना परिचालन गरेर काश्मीरी जनतालाई त्रासमा राखेर आफ्नो एजेण्डा पूरा गर्ने सोचिरहेका छन् ।"
प्रधानमन्त्री खानले थपेका छन्, "आतंकवादसँग लड्न ९० लाख सेना आवश्यक छैन । तपाईंले त ८० लाख काश्मीरलाई त्रसित पार्न ९० लाख सेना परिचालन गर्नुभएको हो ।"
त्यसैगरी उनको निरन्तरको ट्विटमा भारतीय प्रधानमन्त्री मोदी अहिले त्रासपूर्ण अवस्थामा रहेकोसमेत बताएका छन् । उनले भनेका छन्, "भारतीय प्रधानमन्त्री मोदीलाई राम्रोसँग थाहा छ कि यदि त्यहाँ कर्फ्यू हटाइयो भने रक्तपात हुन्छ । त्यसकारण काश्मीरी जनतालाई नियन्त्रणमा लिनका लागि ९० लाख सेना परिचालन गर्नुका साथै कर्फ्यू लगाइएको हो ।"
यसअघि संयुक्त राष्ट्रसंघको महासभामा बोल्दै प्रधानमन्त्री इमरान खानले भारतीय प्रधानमन्त्रीको आलोचना गरेका थिए । उनले भारतीय प्रधानमन्त्री मोदी जातीय सफायामा लागेको र काश्मीरमा कर्फ्यूका कारण जनजीवन निकै सकसपूर्ण भएको बताएका थिए ।
गत अगस्ट ५ मा भारत सरकारले काश्मीरलाई विशेषाधिकार दिएको धारा ३७० खारेज गर्दै काश्मीरमा सेना परिचालन गर्नुका साथै स्थानीय नियन्त्रणमा लिने, सञ्चारका सम्पूर्ण सेवाहरु काट्ने र कर्फ्यू लगाएको थियो । ७० दिनदेखि काश्मीमार कर्फ्यू लगाइएको छ ।
भारतीय प्रधानमन्त्री नरेन्द्र मोदीले भने काश्मीरी जनताको भलाइका लागि धारा ३७० खारेज गरिएको दाबी गरेका थिए ।
अमेरिकी राष्ट्रपति डोनाल्ड ट्रम्पले पाकिस्तानी प्रधानमन्त्री इमरान खानसँग आफू काश्मीर मामिलामा मध्यस्थता गर्ने बताएका थिए भने भारतीय प्रधानमन्त्री नरेन्द्र मोदीसँग काश्मीर विषयमा दुई देशको आपसी मामिला भएको र दुबै देश संवादका माध्यमबाट समस्या समाधान गर्न सक्षम रहेको बताएका थिए ।
डन
