काठमाडौं । यस महिनाको सांगीतिक कार्यक्रम ‘पलेँटी श्रृंखला’मा डाक्टर सुमन थापाले गीत सुनाउने भएका छन् । सुमन पेशाले नेत्र विशेषज्ञ हुन् तर उनी गितारमा औंला चलाउँदै गाउन औधी रुचाउँछन् ।
आफैँ गीत लेख्छन् र धुन पनि भर्छन् । नब्बेको दशकमा ‘बाइपास’ समूहसँग संलग्न रहेर आफ्नो सांगीतिक रहरलाई अगाडि बढाएका सुमन, हाल ‘ब्ल्यू फ्रेट’ नामको सांगीतिक समूहमा क्रियाशील छन् । यसपाली भने उनी पलेँटीका वाद्यवादकहरूसँग गायन अभ्यासमा जुटेका छन् ।
प्राय अंग्रेजी भाषामा गीत, लेख्ने र गाउने सुमन थापा यसपाली पूरै नेपाली भाषाका गीत लिएर प्रस्तुत हुनेछन् । पलेँटीले उनलाई नयाँ सांगीतिक प्रयोग गर्ने सोचका साथ निम्त्याएको जानकारी गराएको छ ।
यसपालीको पलेँटीका निम्ति धेरैजसो गीत कवि श्रवण मुकारुङले लेखेका छन् । प्राय गीतमा डाक्टर सुमनको पेशा सुहाउँदो, आँखा र तिनले निहार्ने दृश्य सम्बन्धित विषय समेटिएको छ । सुमन थापाका निम्ति तयार पारिएका सबै नयाँ गीतहरूमा संगीतकार आभासले धुन भरेका छन् ।
यही कार्तिक महिनाको ८ र ९ गते हुने कार्यक्रमलाई पलेँटीको सुरुआतदेखि नै सञ्चालन गर्दै आएका संगीतकर्मी आभासले गायक सुमन थापाको पेशा र सांगीतिक जीवनको सेरोफेरोमा रहेर संवाद पनि गर्नेछन् ।
कालिकास्थानस्थित ‘आर’शालामा आयोजना हुने पलेँटीमा डाक्टर सुमनलाई वाद्यवादनतर्फ किबोर्डमा दिनेश रेग्मी, गितारमा सुरज प्रधान र प्रकसनमा सुन्दरकुमार महर्जनले साथ दिनेछन् ।