चितवन । नारायणगढको क्याम्पाचौरमा बिहीबारदेखि जारी ‘टुबोर्ग जेसीज विकास रनिङ शिल्ड’को सेमिफाइनलमा नेपाल पुलिस क्लब प्रवेश गरेको छ । एकपक्षीय खेलमा काठमाडौंको सरस्वती क्लबलाई ५-० गोलअन्तरले पराजित गर्दै पुलिस सेमीफाइनलमा प्रवेश गरेको हो ।
पुलिसको जितमा सुमन लामाले ह्याट्रिक गरे । यस्तै निर कुमार राई र हेम तामाङले समान एक–एक गोल गरे । सरस्वतीबिरुद्द पुलिसले खेलको पहिलो मिनेटमा नै अग्रता लिएको थियो ।
यसका लागि सुमन लामाले सुरुवाती गोल गरेका थिए । पहिलो हाफमा नै पुलिसले अग्रता दोब्बर बनायो । खेलको २४ औं मिनेटमा निर कुमार राईले गोल गर्दै पुलिसको अग्रता दोब्बर बनाए ।
पहिलो हाफमा २ गोल गरेको पुलिसले दोस्रो हाफमा थप ३ गोल गर्न सफल भयो । दोस्रो हाफको आठौं मिनेटमा गोल गर्दै हेम तामाङले पुलिसलाई ३–० को अग्रता दिलाए । ३३ औं मिनेटमा सुमनले ब्यक्तिगत दोस्रो तथा टिमको लागि चौथो गोल गरेपछी पुलिसले ४-० को अग्रता बनायो ।
३९ औं मिनेटमा सुमनले ह्याट्रिक पुरा गर्दै पुलिसलाई ५–० को जित दिलाए । खेलको म्यान अफ द म्याच पुलिसको जितमा ह्याट्रिक गरेका सुमन लामा घोषित भए । उनले नगद १० हजार प्राप्त गरेका थिए ।
प्रतियोगिता अन्तर्गत भोली (शनिबार) हुने खेलमा बिभागीय टोली शशस्त्र प्रहरीको एपिएफ र झापा ११ भिड्ने प्रचार प्रसार समिती संयोजक सुर्यभक्त अधिकारीले जानकारी दिए ।