काठमाडौं । प्रधानमन्त्री केपी शर्मा ओलीले मन्त्रिपरिषद् सकेसम्म छिटो पुनर्गठन हुने बताएका छन् । उनले मिति नभने पनि आइतवार बसेको सचिवालय बैठकमा सकेसम्म छिटो हुने बताएका थिए । सचिवालय सदस्यहरुले पनि मन्त्रिपरिषद् पुनर्गठन गर्दा सबैलाई समेटेर जान सुझाव दिएका थिए । सचिवालय सदस्य झलनाथ खनालका अनुसार प्रधानमन्त्री ओलीलाई मन्त्रिपरिषद् पुनर्गठन गर्न सबैलाई समेट्न सुझाव दिइएको थियो ।

“प्रधानमन्त्रीले सकेसम्म छिटो पुनर्गठन गर्ने बताउनुभएको छ,” उनले बाह्रखरीसँग कुरा गर्दै भने,“हामीले सबैलाई समेटेर जानुस् भनेका छौं । भोलि नै हुन्छ भन्न सकिँदैन ।” प्रधानमन्त्री सचिवालय स्रोतका अनुसार सोमबार नै पुनर्गठनको तयारी भएको छैन । “प्रधानमन्त्रीज्यूको सोमवार काठमाडौं बाहिर पनि कार्यक्रम तय भएको छ,” स्रोतले भन्यो ।

प्रधानमन्त्रीले केही समयअघि देखि नै मन्त्रिपरिषद् पुनर्गठन गर्ने बताएको भए पनि अहिलेसम्म हुन सकेको छैन । केही मन्त्री मात्रै हेरफेर गर्ने कि सबै भन्ने बारेमा पनि पार्टीभित्र अनौपचारिक छलफल भएको छ । कतिपय सदस्यले पूरै परिवर्तन गर्न सुझाव दिएका छन् भने कतिपयले केही मात्रै मन्त्री फेर्न सुझाव दिएको स्रोतले बतायो ।