नयाँ दिल्ली । भारतको संसदको शीतकालीन सत्र आजबाट सुरु हुने भएको छ । आउँदो डिसेम्बर १३ सम्म चल्ने संसदको यो अधिवेशनमा ३५ वटा विधेयक पेस हुन लागेको जनाइएको छ । ती विधेयकमध्ये केही निकै चर्चित रहेका छन् ।
ती विधेयकमा नागरिकता संशोधन विधेयक, निजताको अधिकार र इ–सिगरेट प्रतिबन्ध जस्ता महत्वपूर्ण विधेयक रहेका छन् । यसैगरी संविधानको धारा ३७० खारेज गरिएपछिको काश्मीरको अवस्थाका बारेमा पनि छलफल हुनेछ । काश्मीरका तीन पूर्वमुख्यमन्त्री फारुख अब्दुल्ला, उमर अब्दुल्ल र महबूबा मुफ्तीलाई धारा ३७० को खारेजीसँगै नजरबन्द गरिएको थियो ।
आउन लागेको नागरिकता विधेयकमा ६ वर्ष भारतमा बसेको व्यक्तिले नागरिकताका लागि आवेदन गर्न सक्ने व्यवस्था गरिएको छ । यसअघि सो अवधि ११ वर्ष रहेको थियो । (बीबीसी)