काठमाडौं । उत्कृष्ट वृत्तचित्रहरुलाई अवार्ड प्रदान गर्दै ‘फिल्म साउथ एसिया–२०१९’सम्पन्न भएको छ । नोभेम्बर १४ गतेबाट सुरु भएको ४ दिने वृत्तचित्र महोत्सव १७ नोभेम्बरमा सम्पन्न भएको हो ।
हरेक दुईवर्षको अन्तरालमा आयोजना हुने दक्षिण एसियाली देशहरुको सहभागिता रहने यो वृत्तचित्र महोत्सव यो पटक ‘ह्वेर द माइन्ड इज फ्रि’ नाराका साथ नेपालमा आयोजना गरिएको हो ।
अन्तिम दिन हिजो ७ वटा वृत्तचित्रहरु प्रदर्शन गरिएका थिए । जसमध्ये पहिलो हल ‘मजलिस’मा ६ वटा भारतीय र एउटा बंगलादेशको वृत्तचित्र प्रदर्शन गरिएको थियो । भने दोस्रो हल ‘बग्गीखाना’मा सात वटा भारतीय, एकवटा पाकिस्तान र एकवटा बंगलादेशको वृत्तचित्र प्रदर्शन गरिएको थियो ।
छनोटमा जम्मा ६३ वटा वृत्तचित्र परेपनि ५१ वटा मात्रै उत्कृष्ट पुरस्कारको लागि प्रतिस्पर्धामा परेको थियो । महोत्सवमा २ वर्ष अघि बनाएका वृत्तचित्रहरुले मात्रै सहभागीता जनाउन पाएका थिए ।
५१ वटा चलचित्रमध्ये ३ जनाको जुरी सदस्यहरुले उत्कृष्ट ५ वृत्तचित्रहरु छानेका थिए । जुरीमा भारतका आयशा अब्राहम, श्रिलंकाका शिवमोहन सुमती र नेपालका कुन्द दीक्षित रहेका थिए ।
बंगलादेशका निर्देशक शाहिन दिल–रियाजको वृत्तचित्र ‘ब्याम्बो स्टोरिज’ले ‘रामबहादुर’ ट्रफी शीर्षकमा दुई हजार अमेरिकी डलरसहित उत्कृष्ट वृत्तचित्रको अवार्ड पाउन सफल भए ।
त्यस्तै ‘रनर अप’ अवार्ड एक हजार अमेरिकी डलर पुरस्कारसहित भारतीय निर्देशक अमित महान्तीको वृत्तचित्र ‘स्क्रयाचेज अन स्टोन्स’ले प्राप्त गर्न सफल भएको हो ।
भने भारतीय निर्देशक सिमोन मेस्टरोनीको वृत्तचित्र ‘आफतर प्रेर्यस’ले एक हजार अमेरिकी डलरसहित ‘द तारेक मसूद बेस्ट डेब्यूट फिल्म अवार्ड’ प्राप्त गरेका छन् ।
यस्तै ‘युनिसेफ अवार्ड फर द बेस्ट फिल्म अन चिल्ड्रेन्स इसियु’ अन्तर्गत निर्देशक अबूझार अमिनीको अफगानिस्तानी वृत्तचित्र ‘काबुल, सिटी इन द माइन्ड’ले एक हजार अमेरीकी डलर प्राप्त गरेकोे हो ।
अन्तिम अवार्ड, ‘द बेस्ट स्टुडेन्ट फिल्म अवार्ड’ अन्तर्गत ५ सय अमेरिकी डलरसहित भारतीय वृत्तचित्र मेमोरिज अफ ‘साइरा एण्ड सलिम’ र नेपाली निर्देशकद्धय आशिष लिम्बू र देविन राईको वृत्तचित्र ‘द विन्टर ट्याप’ ले संयुक्त रुपमा पाएका छन् ।
तस्बिरः रुजन महर्जन