गएको साता नेपालीको भावनात्मक एकताको लागि निकै महत्त्वपूर्ण रह्यो । नेपालीले संभवतः पहिलोपल्ट नेपालका महिलाबाट एकमुष्टरुपमा यति ठूलो आत्मसम्मान प्राप्त गरे र नेपाली महिलाको उपलब्धिबाट देशमा एक अभूतपूर्व राष्ट्रिय एकताको वातावरण बन्यो । नेपाली महिलाले दक्षिण एसियाली खेलकुदमा देखाएको प्रदर्शनले नेपाल यस क्षेत्रको बलियो ‘खेल राष्ट्र’को रुपमा पनि गनिन पुगेको छ । 

सन् १९८४ मा काठमाडौंबाट सुरु भएको दक्षिण एसियाली खेलकुद सन् १९९९ मा नेपाल फक्र्यो र अहिले एकैपल्ट २० वर्षपछि फेरि नेपालले सन् २०१९ मा यो खेलको आयोजना गरेको छ । यस खेलको उद्घाटन १५ मंसिरमा नेपालकी राष्ट्रपति विद्या भण्डारीले गरिन् । काठमाडौंको दशरथ रङ्गशालामा उद्घाटन भएको यो खेल काठमाडौं, पोखरा तथा जनकपुरमा खेलियो । यस खेलमा जम्मा २६ विभिन्न स्पर्धा रहेको र तिनमा ३१७ स्वर्ण र त्यतिनै रजत पदकका लागि प्रतिस्पर्धा हुनेमा शनिवारसम्म २१६ स्वर्णको निर्णय आइसकेको र अन्तिम तीन दिनमा अझै १०१ स्वर्णको निर्णय हुन बाँकी छ । अहिलेसम्म ४५ स्वर्ण पदक जितेर हालसम्म नेपालले कुनै पनि साग खेलमा जितेको स्वर्णको रेकर्ड पनि तोडेको छ । अहिलेसम्मको नतिजाले नेपाल सन् २०१९ को साग खेलको पदक तालिकामा दोस्रो हुने निश्चितजस्तै देखिएको छ । 

नेपालकी महिला राष्ट्रपतिबाट उद्घाटन भएको यो खेलमा नेपाली महिलाको प्रदर्शनले नेपालीको शिर उँचा बनाएको छ भने सम्पूर्ण नेपालीलाई राष्ट्रिय एकताको भावनामा एकजुट पनि बनाएको छ । मंसिर १६ गते भएको कराँते र तेक्वान्दो प्रतियोगितामा नेपाल सात सात स्वर्ण र ट्रायथोलनमा एकगरी प्रथम दिनमै १५ स्वर्ण पदक जित्न सफल भयो । पहिलो दिन मण्डेकाजी श्रेष्ठले दुई स्वर्ण जिते भने आयसा शाक्यले पनि दुई वटै स्वर्ण ल्याइन् । पहिलो दिन भित्रिएका १५ स्वर्णमा आठ स्वर्ण महिला खेलाडीको नाममा आयो, पुरुषले सात ल्याए । सबैजसो दैनिक पत्रिकाले मण्डेकाजी र आयसाको तस्बिरलाई महत्त्वका साथ प्रकाशित गरे ।

मंगलवारको पत्रिकाका मुख्य रोजाइमा परिन् सन्तोषी श्रेष्ठ । सबैजसो पत्रिकाले सन्तोषीले १० हजार मिटरको दौड ३५ मिनेट ०७.९४ सेकेण्डमा पूरा गर्दै एक मिलिसेकेन्डले भारतकी कविता यादवलाई पछि पारिन् । सो दिनका पत्रिकामध्ये  कान्तिपुरले सन्तोषीले जित्दै गरेको क्षण कैद गरेको तस्बिरलाई मुख पृष्ठमा प्रकाशित गर्दै उत्कृष्ट ‘ले आउट’ बनायो । अन्नपूर्ण पोस्टले पनि सन्तोषीको तस्बिरलाई नै महत्त्वका साथ प्रकाशित गर्‍यो । नयाँ पत्रिकाबाहेक यो उपलब्धिलाई सबै समीक्षित दैनिकले प्रथम पृष्ठमा महत्त्वका साथ स्थान दिए । बिहीवार नेपालले आफ्नो स्वर्णको संख्यामा आठ स्वर्ण थपेर कुल २३ स्वर्ण बनायो र तालिकामा सो दिन पनि अग्रस्थानमा नै रहन सफल भयो । 

बिहीबारका दैनिक पत्रिकामा सागको कभरेज अलि कम देखियो । तर पनि नेपालले २९ स्वर्ण ल्याएको समाचारलाई गोरखापत्रले सात कोलमको मुख्य समाचार बनायो भने अन्नपूर्ण पोस्टले सबै सागमा गरी नेपालले कुल १०० स्वर्ण कटाएको समाचारलाई महत्त्व दियो । शुक्रवार पौडी सुन्दरी गौरिका सिंहले पौडीको व्यक्तिगत स्पर्धामा नेपालका लागि पहिलोपल्ट स्वर्ण दिलाइन् । उनको सो पदक २०० मिटर पौडीको फ्रि–स्टाइलमा आएको थियो । कान्तिपुर, नागरिक, अन्नपूर्ण पोस्ट, गोरखापत्र, राजधानी सबैले गौरिकाको तस्बिरलाई मुख पृष्ठमा महत्वका साथ प्रकाशित गरे । 

महिला खेलाडीले नेपालको नाम राखेको विषयलाई शनिबारका अन्नपूर्ण पोस्ट तथा नयाँ पत्रिकाले उद्घोष गरे । अन्नपूर्ण पोस्टले नेपालको नाम चम्काउन सफल कीर्तिमानधारी नौ महिलाको तस्बिरसहित स्वर्ण पदक समातेको हात राखेर निकै उत्कृष्ट ले आउट बनायो । सो दैनिकले कुन कुन स्पर्धामा महिलाले कति स्वर्ण प्राप्त गरे तथा पुरुषले कति ल्याए भन्ने सूची पनि बनायो । जसअनुसार शुक्रवारसम्म भएको खेलमा नेपालले कुल ४१ स्वर्ण ल्याएको छ ।
अन्नपूर्ण पोस्टले शीर्षक बनायो ‘चेलीले चम्काएको साग’ । त्यस्तै नयाँ पत्रिकाले पनि ‘स्वर्णमा पुरुषभन्दा महिला अगाडि’ शीर्षकमा ब्यानर समाचार प्रकाशित गर्‍यो । नयाँ पत्रिकाले आयषा शाक्यको तस्विरलाई मुख्य बनाउँदै गौरिका सिंह, सञ्जु चौधरी, सन्तोषी श्रेष्ठ, सुनीता श्रेष्ठको तस्विर प्रकाशित गर्‍यो । त्यस्तै मन्डेकाजी श्रेष्ठ तथा सुवास तामाङको तस्बिर पनि प्रकाशित गर्‍यो । 
शनिबार नेपालका लागि म्याराथुनमा स्वर्ण जितेका किरणसिंह बोगटीको तस्बिरले आइतवारका पत्रिका रंगिए । बोगटीले दुई घण्टा २१ मिनेट १७ सेकेण्डमा दुरी पुरा गर्दै नेपाललाई स्वर्ण दिलाए । सबैजसो दैनिकले बोगटीको विजयलाई उनको तस्बिरसहित सम्मान दिए । शनिवारसम्ममा नेपालले कुल ४३ स्वर्ण जितेर पदक तालिकामा आफूलाई दोस्रो स्थानमा उभ्याउन सफल भएको छ । भारतले पहिलो स्थानमा रहेर ११० स्वर्ण जितेको छ भने श्रीलंका ले ३०, पाकिस्तानले २३, बंगलादेशले सात तथा मालदिभ्सले एक स्वर्ण जितेका छन् । हालसम्म भुटानले भने ६ कांस्य पदकमात्र प्राप्त गरेको छ ।