इश्लामावाद । पाकिस्तानको लाहोरमा चिकित्सकसँग बदला लिनको लागि हजारौं वकिलले एक अस्पतालमा पसेर तोडफोड गरेका छन् । त्यस क्रममा गम्भीर रुपमा घाइते रहेका केही बिरामीको मृत्यु भएको छ । पाकिस्तानको अखबार डनका अनुसार पञ्जावका स्वास्थ्यमन्त्री यास्मीन राशिदले मृत्यु हुने बिरामीको संख्या कम्तिमा तीन भएको बताएका छन् ।
यो घटनामा ४० वकिललाई गिरफतार गरिएको छ । मानवअधिकार मन्त्री शिरीन माजरीले ट्विट गर्दै यो घटनाको जानकारी गराएका हुन् । बुधबार लाहोरको पञ्जाब इन्स्टिच्युट अफ कार्डियोलोजीमा ठूलो संख्यामा वकिल छिरेर तोडफोड मच्चाएका हुन् । वकिलहरुका अनुसार दुई हप्ता पहिला उनीहरुको एक साथीलाई चिकित्सकले गरेको हमलाको विरुद्धमा वकिलले हिजो आक्रमण गरेका हुन् । (बीबीसी)